Die jaarlikse Desmond Malgas Legacy Rugbybeker het Saterdag groot opwinding na die Bridgton-sportgronde, beter bekend as “Die Plate”, gebring waar ses spanne om die eer meegeding het. Rugbyliefhebbers het in hul getalle opgedaag om ’n dag van harde, maar goeie sport te geniet.
Die toernooi het afgeskop met ’n kragmeting tussen Collegians RFC en Kavaliers RFC. Albei spanne het van die begin af gewys dat hulle nie sou terugstaan nie. Spelers het met oorgawe verdedig en elke meter grond moes verdien word.
In die volgende wedstryd het Multisure All Blacks RFC teen Spring Roses RFC te staan gekom. Dit was ’n mededingende ontmoeting waarin beide spanne hul kanse benut het. Multisure All Blacks het egter hul geleenthede beter afgerond en die wedstryd uiteindelik met 19–10 gewen.
Hul gestruktureerde aanval en gedissiplineerde verdediging het die verskil gemaak, terwyl Spring Roses tot die einde toe druk toegepas het.
Daarna was alle oë gerig op die hoofwedstryd van die dag tussen Harlequins RFC en Oudtshoorn RFC. Hierdie ontmoeting het beslis nie teleurgestel nie. Dit was ’n taai, intense stryd waarin geen span bereid was om ’n tree terug te staan nie. Die wedstryd het heen en weer geswaai met momentum wat gereeld verander het soos beide spanne punte aangeteken het.
Oudtshoorn RFC het met passie en vasberadenheid gespeel en hul ondersteuners op die punte van hul stoele gehou. Harlequins RFC het egter kalm gebly onder druk en hul spelplan goed uitgevoer. Met sterk verdediging in die laaste minute en koelkop-skopwerk is die wedstryd uiteindelik naelskraap met 17–15 deur Harlequins beklink.
Die toeskouers is deurgaans uitstekend vermaak met opwindende hardloopspel, harde duikslae en goeie sportmanskap. Die atmosfeer langs die veld was feestelik, met ondersteuners wat hul spanne luidkeels aangemoedig het.
Die Desmond Malgas Legacy Rugbybeker bly ’n belangrike geleentheid op die plaaslike rugbykalender. Buiten die mededinging op die veld, dien dit ook as ’n platform om gemeenskappe saam te bring en die nalatenskap van Desmond Malgas te vier.
Met die gehalte rugby wat vanjaar vertoon is, sien ondersteuners reeds uit na volgende jaar se toernooi. (GRANWILLE GOLIATH)
Harlequins RFC klop vir Oudtshoorn RFC
Foto verskaf