Goed … Beter… Pasta! (2)

LAASWEEK het ons na die maak van vars pasta gekyk. Hierdie week berei ons klein pasta-beursies (ravioli), gevul met ’n knoffelslak, voor.

Eenvoudig bedien met ’n sprinkeling van goeie olyfolie en vars gerasperde Parmesankaas, is dit ’n goeie opsie wanneer jy indruk met ’n ete wil maak, maar ook as jy net lekker wil speel in die kombuis.

Vir die “Nee, ek eet nie ’n slak nie” -garde; moenie ophou lees nie!

Hierdie verruklike pastabeursies kan met enige vulsel voorberei word: afgekookte beesstert of volstruisnek, gemaalde ertjies en kruisement, tiemie-hoender en sampioen, of selfs net die kaas (of kase!) van jou keuse. Vandeesweek gebruik ons wel die ewig-elegante knoffelslak.

Slakke as ’n dis is nie ’n nuwe gier nie. Die mens eet slakke al vir duisende jare. Hulle is laag in vet en hoog in beide vog en proteïn. Die Romeine het ’n geskiedenis met slakke as ’n dis, en volgens die Romeinse ouderling, Plinius, het hy sy slakke wyn en vleis gevoer wat hulle dan ’n diep en ryk geur gegee het. Vandag is die kommersiële boerdery met kulinêre slakke, ook heliciculture genoem, hoogs winsgewend, selfs hier in Suid-Afrika.

As dit kom by die ravioli strek die herkoms ook ver. Die vroegste bekende vermelding van ravioli verskyn in die persoonlike briewe van Francesco di Marco Datini, ’n handelaar van Prato in Italië in die 14de eeu. Daar is egter vele internasionale weergawes van dié smaaklike klein pastabeursies.

In Turkye is daar Manti.

Dit is gevul met spese­rye en word bedien met ’n paprikasous en joghurt.

Soortgelyke geregte in China is die jiaozi of wonton.

In Indië is daar weer die gewilde gujiya. Dit word soet voorberei met ’n vulsel van droë vrugte, suiker en ’n mengsel van soet speserye, en dan diepgebraai in olie. ’n Soortgelyke Midde-Oosterse gereg genaamd shishbarak is gevul met ge­maalde beesvleis en word gaargemaak in warm joghurt.

Ravioli neem wel ’n bietjie tyd om voor te berei, maar dit is definitief die moeite werd.

Dit kan vooraf gemaak en in die yskas gehou word vir tot vier ure voordat dit in die kookpot gedompel word.

Vir die maak van die pastavelle – al die inligting is in laasweek se eerste kosrubriek in dié reeks.

Vir ravioli werk dunner pastavelle oor die algemeen beter. Dit verleen ’n delikate element aan die pasta wat jou vulsel omhels. Ons het hier ook salieblare in ons pastavelle ingerol, wat weer ’n fassinerende visuele element verleen. (Hooffoto)

Metode:

  1. Panbraai jou slakke in botter en fyngekapte knoffel. ’n Knypie vars en fyn pietersielie of salie kan bygevoeg word. (Foto 1)
  2. Lê jou varsgerolde pastavel neer op ’n droë werksoppervlak wat met meel bestrooi is. Skep nou jou knoffelslakke versigtig op jou pastavel en laat genoeg spasie rondom elke slak sodat jy die pastabeursie met jou vingers sal kan seël. (Foto 2)
  3. Maak die pasta rondom elke slak effe nat met wa­ter. Dit help met die seël van die beursie. (Foto 3)
  4. Lê nou jou tweede pastavel bo-oor die slakke neer en druk versigtig plat om sodoende elke slak in sy eie beursie te seël. Probeer om so min as moontlik lug saam met jou slak in die beursie vas te vang. (Foto 4)
  5. Sny nou elke individuele ravioli los van die res en onthou om ’n lekker breë pastarand om elk­een toe te laat. (Foto 5)
  6. Blansjeer jou raviloli in vinnig kokende soutwater totdat die pasta vir jou gaar genoeg proe. (Foto 6)
  7. Bedien jou Escargot Ravioli dadelik met ’n sprinkeling goeie olyfolie en vars gerasperde Par­me­sankaas. (Foto 7)
    En moenie die wyn vergeet nie!

Volgende week praat ons met ’n internasionale ster-sjef wat op Oudtshoorn grootgeword en skoolgegaan het! Moet dus nie ons volgende kosrubriek misloop nie. Tot dan, buon appetito! En onthou om foto’s van julle ravioli-disse te stuur! (Deur Robert Koen)