DIE verhoor van twee mans van Bridgton op Oudtshoorn wat van poging tot moord aangekla word ná ’n voorval meer as vyf jaar gelede in Hectorstraat, Bridgton, is verlede week met die ge- tuienis van een van die beskuldigdes voortgesit.
Clayton Wagner (26) en Damian Matthews (27) word daarvan aangekla dat hulle die aand van 13 Mei 2017 vir Bertram Pietersen met ’n panga gekap, hom geskop en op hom getrap het. Albei pleit onskuldig.
Wagner het verlede week getuig dat hy die betrokke aand met sy tante gepraat het nadat sy en haar dogter in ’n woordewisseling was. Sy tante het toe vir Pietersen laat roep, wat hom toe glo gedreig het en gesê het dat hy hom sal doodmaak.
Wagner het later vir Matthews gaan haal en teruggekeer huis toe om sy klere te kry omdat hy by Matthews sou oorslaap.
Volgens hom was hy by die agterdeur toe hy vir Pietersen met ’n mes by die hek sien inkom het. Hy, Matthews en nog ’n vriend het toe weggehardloop.
Hulle het oor ’n lae muurtjie gespring en so 500 meter verder gehardloop voordat hulle omgekyk het en gesien het dat Pietersen hulle nie agterna gesit het nie. Wagner sê hy het die volgende dag gehoor dat Pietersen glo aangerand is. Hy het ont-ken dat hy, Matthews en drie ander die aand vir Pietersen aangerand het.
Wagner het onder kruisverhoor deur die staats-aanklaer, Corné Pretorius, gesê dat hy die selfoon waarop hy die boodskappe van Pietersen se aanranding ontvang het, in dieselfde jaar van die voorval verloor het. Oor sy getuienis waarin hy homself weerspreek, het hy geantwoord dat hy “confused” was.
Bronwynne Swartbooi het vroeër getuig dat hy voor ’n winkel in Hectorstraat gesit het en gesien het hoe Pietersen deur die twee beskuldigdes en nog drie mans aangerand word. Volgens hom het Wagner vir Pietersen met ’n kapmes gekap, dit neergegooi het en toe weggehardloop het.
Mariaan Swartbooi het egter getuig dat dit Matthews was wat vir Pietersen met die kapmes gekap het. Volgens haar was daar vroeër die aand ’n woordewisseling tussen Wagner en Pietersen.
Sy het ook gesien dat die beskuldigdes en hul vriende ’n kapmes en stok in ’n pakkamer gaan haal het. Pietersen het geval nadat Matthews hom met die kapmes gekap het. Terwyl hy op die grond gelê het, is hy met die stok geslaan waarna sy aanvallers weggehardloop het. Sy en twee vriende het met klippe na Pietersen se aanvallers gegooi en hulle het teruggegooi.
Die beskuldigdes se regsverteenwoordiger, Lourens Swanepoel, het dit aan Swartbooi gestel dat sy ’n storie opmaak en dat haar weergawe verskil van dié van Bronwynne Swartbooi.
Die saak word deur streeklanddros Ntsoki Moni aangehoor en is vir verdere kruisondervraging van Wagner uitgestel tot Vrydag 10 Februarie. (Deur Garnett Wicomb)
