DIE saak teen die raadslid van Oudtshoorn wat van seksuele aanranding aangekla word en sedert September verlede jaar in aanhouding is, is Dinsdag (21 Februarie) in die Oudtshoorn Landdroshof vir verdere verhoor na die streekhof oorgeplaas.
Die staatsaanklaer, Zelda Jass, het die hof meegedeel dat die direkteur van openbare vervolging (DOV) steeds wag op navrae wat hy aan die staat gerig het.
Daar is egter beslis dat die saak na die streekhof oorgeplaas word, ten spyte van teenkanting deur landdros Ryan van Harte.
Die beskuldigde se regsverteenwoordiger, Jurgen Loff van Liezel Scholtz Prokureurs, het beswaar gemaak teen die verdere uitstel van die saak omdat dit sy kliënt benadeel.
Hy wou redes hê hoekom die saak uitgestel is.
Van Harte het gesê dit is die verdediging se reg om beswaar te maak en Loff aangeraai om met die beskuldigde se eerste streekhofverskyning op 14 Maart aan te dring op antwoorde op die instruksies van die DOV.
Indien dit nog nie uitgevoer is nie, moet Loff ’n aansoek bring dat die saak van die hofrol verwyder moet word. (Deur Garnett Wicomb)
