’n Onderwyser van Hoërskool Calitzdorp het onlangs ’n sleutelrol gespeel in die veilige geboorte van ’n baba nadat swaar reën en vloede toegang tot ’n afgeleë plaas buite Calitzdorp afgesny het.
Volgens die Wes-Kaapse Departement van Gesondheid en Welstand se Nood Mediese Dienste (NMD) is nooddienste op die middag van die voorval na ’n swanger vrou op ’n plaas ontbied. Weens oorstroomde paaie kon geen ambulans die plaas bereik nie, terwyl swak weerstoestande ook verhoed het dat Air Mercy Service (AMS) per helikopter kon help.
Janine Ruiters-Makier, stasiebestuurder van NMD in Ladismith, en Norman Swartz, van EMS in Calitzdorp, het die situasie op afstand gekoördineer.
By die swanger vrou was Cornelle Meiring, ’n onderwyser aan Hoërskool Calitzdorp, wat onmiddellik ingespring het om te help.
Ruiters-Makier het Meiring telefonies en later deur middel van ’n video-oproep stap vir stap deur die geboorteproses begelei. Sy het haar onder meer gehelp om noodsaaklike items soos handskoene, skêre en ander benodigdhede gereed te kry.
Omstreeks 17:15 het die vrou aktief begin kraam en, met kalm leiding en ondersteuning, is die baba veilig gebore.
“Toe ek die baba vir die eerste keer sien, was ek ongelooflik dankbaar. Ek kon sien die baba is gesond en alles is in orde,” het Ruiters-Makier gesê.
Sy het daarna in kontak gebly om seker te maak dat dit goed gaan met beide die moeder en haar pasgebore baba totdat verdere hulp gereël kon word. Toe die weer later opklaar, is die moeder en baba per helikopter na ’n mediese fasiliteit geneem vir verdere sorg.
Die moeder en haar pasgebore baba se identiteit word ter wille van hul privaatheid weerhou. Die moeder het haar waardering uitgespreek vir die sorg en ondersteuning wat sy ontvang het.
Benewens die suksesvolle geboorte het NMD, saam met verskeie rolspelers, ook hulp verleen aan gemeenskappe wat deur die vloede afgesny is. In Warmbad naby Calitzdorp is kos en komberse aan 60 huishoudings versprei.
Die hulpverlening was ’n gesamentlike poging tussen NMD, AMS, die Tuinroete-branddienste, Gift of the Givers, Provinsiale Verkeersdienste, Karoowater Gasteplaas, plaaslike boere en ander gemeenskapslede.
“Op die platteland help mense mekaar. Omdat ons mekaar ken, spring almal in en doen hul deel,” het Ruiters-Makier gesê.
Die provinsiale bestuurder van NMD, Shameem Modack-Robertson, het die betrokkenes geloof.
“Hierdie voorval wys die buitengewone veerkragtigheid van ons NMD-spanne en die gemeenskappe wat ons dien. Ons is ongelooflik trots op Ruiters-Makier, Swartz, Meiring en al die vennote wat betrokke was.”
Volgens Craig Wylie, direkteur van Wes-Kaapse NMD, was NMD en hul vennote tydens die onlangse vloede by meer as 40 reddingsoperasies betrokke wat meer as 650 mense geraak het.
Lees ook:
Young boy helps CWR after floods
Nerené wys veggees ná ernstige motorongeluk