Die meer as 750 000 huishoudings wat tans op die Wes-Kaapse Behuisingsvraagdatabasis geregistreer is, moet nie gesien word as mense wat almal in een ry vir dieselfde soort staatshuis wag nie.
Só verduidelik Tertuis Simmers, Wes-Kaapse minister van infrastruktuur, wat sê behuisingsbehoeftes en die hulp waarvoor huishoudings kwalifiseer, kan aansienlik verskil.
Volgens Simmers dui registrasie op die databasis daarop dat ’n huishouding ’n behoefte aan behuisingshulp geregistreer het, maar beteken dit nie outomaties dat die huishouding reeds vir ’n bepaalde subsidie of behuisingsprojek kwalifiseer nie.
“Registrasie teken die behoefte aan behuising aan. Kwalifikasie word bepaal wanneer ’n huishouding vir ’n spesifieke behuisingsgeleentheid oorweeg word en sy omstandighede aan die toepaslike kriteria getoets word,” het hy verduidelik.
Die databasis bevat tans meer as 750 000 geregistreerde huishoudings regoor die Wes-Kaap. Simmers waarsku egter dat dit nie beteken dat al dié huishoudings vir presies dieselfde tipe behuising wag nie.
Mense se omstandighede verander ook met verloop van tyd. Hulle kan verhuis, huishoudelike samestelling en inkomste kan verander, of iemand kan intussen eiendom bekom of elders reeds staatsondersteunde behuisingshulp ontvang het.
Dit is volgens Simmers waarom inwoners hul besonderhede op die databasis op datum moet hou en waarom begunstigdes geverifieer word.
Behuisingshulp behels ook meer as net die bou van volledig gesubsidieerde huise.
Sommige huishoudings kan vir ’n gesubsidieerde woning kwalifiseer, terwyl ander deur ’n gedienste erf, die opgradering van ’n informele nedersetting of huurbehuising gehelp kan word.
Werkende huishoudings met ’n maandelikse inkomste van tussen R3 501 en R22 000 kan volgens die departement moontlik vir First Home Finance kwalifiseer om hulle te help om die eiendomsmark te betree.
Gedurende die 2025/26-boekjaar is 5 213 behuisingseenhede in die Wes-Kaap voltooi en 1 358 gedienste erwe gelewer. Altesaam 1 165 huishoudings is deur First Home Finance ondersteun, terwyl opgraderingswerk aan informele nedersettings deur 44 projekte gevorder het.
Simmers het ook benadruk dat munisipaliteite ’n belangrike rol in behuisingsontwikkeling speel.
Volgens hom kan projekte nie bloot gebou word waar die meeste name op ’n databasis voorkom nie.
Faktore soos beskikbare en geskikte grond, grootmaatinfrastruktuur, water- en sanitasiekapasiteit, vervoer, skole, werksgeleenthede, beplanningsgoedkeurings en beskikbare finansiering moet ook in ag geneem word.
’n Verdere uitdaging is die agterstand met titelaktes.
Volgens die provinsie se Behuisingsubsidiestelsel wag ongeveer 40 217 begunstigdes tans op titelaktes, hoewel dié syfer nog deur munisipaliteite geverifieer moet word en die onderliggende data nie volledig is nie.
Simmers sê ’n titelakte beteken meer as bloot die ontvangs van ’n huis, aangesien dit wettig geregistreerde eienaarskap aan ’n huishouding gee en die eiendom as ’n bate aan toekomstige geslagte oorgedra kan word. Simmers erken dat die behoefte aan behuising steeds groter is as wat die regering met beskikbare hulpbronne kan aanspreek.
Geskikte grond is beperk, grootmaatinfrastruktuur is in verskeie munisipaliteite onder druk en boukoste neem steeds toe. Daar was volgens hom ook die afgelope jare druk op nasionale behuisingsbefondsing.
“Die behoefte aan behuising is werklik. Die agterstand is werklik. Maar so ook die vordering,” het Simmers gesê.
Hy meen die fokus moet daarom wees op ’n meer akkurate Behuisingsvraagdatabasis, deurlopende verifikasie van begunstigdes, die koppeling van huishoudings aan die regte vorm van behuisingshulp en vinniger oordrag van titelaktes.
Vir meer inligting oor behuisingsprogramme, dienste en projekte van die Wes-Kaapse departement van infrastruktuur, kan inwoners die departement se webwerf by westerncape.gov.za/infrastructure besoek.
Be the first to comment on "Behuisingsdatabasis is nie bloot ’n waglys vir ’n huis nie"