Raad teen die warm Karoo hitte

Foto: Die Hoorn argief

Met hoër as normale temperature wat dié somer oor groot dele van die land verwag word, vra die Oudtshoorn Munisipaliteit inwoners om voorsorg te tref op warm dae.

Vir ouers beteken dit onder meer om kinders gereeld te laat water drink en in die skadu te laat rus wanneer hulle buite in die son speel.

Wanneer kinders op warm dae buite baljaar, moet ouers en versorgers sorg dat hulle gereeld water drink, veral as hulle in die son speel. Hou ’n waterbottel byderhand en laat kinders tussen speletjies in die skadu rus en water drink, selfs al is hulle nog nie dors nie.

Die Suid-Afrikaanse Weerdiens se seisoensvooruitsig dui daarop dat maksimumtemperature dié somer oor groot dele van die land waarskynlik hoër as normaal sal wees. El Niño, ’n klimaatspatroon wat met warmer seewater in die tropiese Stille Oseaan gepaardgaan, sal na verwagting tot minstens vroeg in 2027 sterk bly.

Oudtshoorn Munisipaliteit raai inwoners aan om gereeld water te drink en gedurende die warmste ure in die skadu of op ’n koel plek binnenshuis te bly.

Beplan strawwe buitelugaktiwiteite vir die koeler ure. As jy buite gaan wees, dra ligte klere en ’n hoed en smeer sonskerm aan.
Inwoners word ook gevra om op warm dae by ouer mense in te loer, veral by dié wat alleen woon.

Ouers en versorgers moet nooit ’n kind alleen in ’n geparkeerde voertuig los nie.

Duiseligheid, hoofpyn en swakheid kan tekens van hitte-uitputting wees. As iemand ná blootstelling aan erge hitte verward raak of inmekaarsak, kry onmiddellik mediese hulp.

’n Duik in een van Oudtshoorn se munisipale swembaddens is ook ’n lekker manier om op warm dae af te koel.

Dagtoegang kos R20 per volwassene en R10 per student of kind jonger as 12.

Pak die waterbottels saam met die handdoeke as julle gaan swem. Roep die kinders af en toe uit die water vir ’n drinkpouse in die skadu.

Be the first to comment on "Raad teen die warm Karoo hitte"

Leave a comment

Your email address will not be published.


*