DIE munisipale raad van die Groter Oudtshoorn kon nie Dinsdag daarin slaag om die raad se begroting vir 2022/2023 voor die spertyd vir munisipale begrotings van 31 Mei goed te keur nie.
Hoewel die burgemeester, Chad Louw, die begroting vir goedkeuring aan die raad voorgelê het, het slegs die twaalf raadsede van die ANC, OGI, Advieskantoor, Good en PA dit gesteun. Die steun van dertien raadslede is nodig vir ’n meerderheidsbesluit.
Die beherende koalisie het nie tans ’n meerderheid in die raad nie met ’n vakature vir ’n raadslid vir Saamstaan wat nog nie gevul is nie.
Die twaalf opposisieraadslede van die DA, Icosa en die VF Plus het teen die goedkeuring van die begroting gestem op grond daarvan dat sekere belangrike prosesse nog nie plaasgevind het nie.
Raadslede Chris Macpherson (DA) en Vlancio Donson (Icosa) het daarop gewys dat daar nie vanjaar soos in die verlede ’n werkswinkel oor die begroting was waar raadslede vrae kon vra en insette kon lewer, die begroting bespreek kon word en hulle ingelig kon word nie.
Die Geïntegreerde Ontwikkelingsplan (GOP) vir die Groter Oudtshoorn is voorts ook nog nie bespreek en goedgekeur soos vereis word nie, terwyl die munisipale organogram ook nog goedgekeur moet word.
Donson het ook sy kommer daaroor uitgespreek dat die huidige raad nog slegs 30% tot 40% van die kapitale toewysings (grants) wat deur die regering aan die dorp beskikbaar gestel is vir die belastingjaar 1 Julie 2021 tot 30 Junie 2022 bestee het.
Die speaker, Colan Sylvester, het in reaksie hierop aangedui dat die raad weer op Maandag 6 Junie sal vergader en die begroting sal oorweeg vir goedkeuring. Intussen sal die raad aandag skenk aan die uitstaande prosesse. (Deur Liesel le Roux)
