DIE toekoms van Oudtshoorn en De Rust Toerisme; die hoop dat Suid-Afrika spoedig van die Verenigde Koninkryk se “rooilys” vir besoekers afgehaal mag word; en die belangrikheid en rol van ’n toerisme-organisasie was almal punte wat verlede Donderdagaand (19 Augustus) tydens die Algemene Jaarvergadering van Oudtshoorn en De Rust Toerisme deur Hannelie du Toit, hoof-operasionele bestuurder van die Southern Africa Tourism Services Association, aangespreek is.
Die vergadering het die aand by Buffelsdrift Game Lodge buite Oudtshoorn plaasgevind.
Du Toit het tydens die vergadering uitgebrei oor wat alles struikelblokke is waarmee die toerismebedryf tans tydens die Covid-19-pandemie te kampe het. Sy het ook verwys na die belangrikheid daarvan om inentingsinformasie aan toeriste wat die land wil besoek te verskaf/vertoon, asook gesels oor die moontlikheid van ’n digitale inentingspaspoort vir Suid-Afrikaners wat internasionaal sal wil reis.
Die nuwe toerismekomitee vir die volgende jaar is ook aangewys. Hulle is Alison Moos, Johan Keller, Tammy Moult, Pienaar Muller, Shanel Lambrechts, Suné Linde, Jan Venter, Willie Immelman, Lucius Fourie, Carina Fourie en Roselle Crafford.
Dié Covid-struikelblokke by toerismevergadering bespreek
Corleen Barnard (links), Oudtshoorn en De Rust toerismebestuurder; burgemeester Chris Macpherson; Tammy Moult, voorsitter van Oudtshoorn en De Rust Toerisme; en raadslid Johan Fourie tydens Oudtshoorn en De Rust Toerisme se algemene jaarvergadering op 19 Augustus by Buffelsdrift Game Lodge. Foto: Robert Koen