HY is baie dankbaar vir ’n ruim skenking van Gretchen Coerecius van Mosselbaai wat hy onlangs aan die Irma Bruschi Interim-huis op George kon oorhandig, sê Japie Coetzee, bekende inwoner van Oudtshoorn.
In dié interimhuis kan kankerpasiënte van Oudtshoorn en ander buurdorpe tydens bestraling- en chemoterapiebehandeling vir tot ses weke lank oorbly.
Coetzee het by die huis betrokke geraak toe sy vrou, Jane, voor haar dood in 2020 daar oorgebly het, en hy het hom sedertdien daartoe verbind om te help om fondse en kruideniersware vir die huis in te samel.
“Ek is so beïndruk met hierdie pragtige jong dame,” sê Coetzee oor Coerecius.
“Sy het haar eie projekte waardeur sy uitreik na mense in nood en gee kos, oorhandig hampers, versorg kinders en sien om na almal in nood.
“Sy is inderdaad ’n engel.
“En te midde van dit alles was sy bereid om van haar eie projekte se donasies vir die interim-huis te skenk.”
Coetzee gesels volgende week Woensdag (12 Oktober) ook in die TV-program Dankie, Lottoland wat die Irma Bruschi Interim-huis besoek.
Die program word op DSTV kanaal 144 om 21:30 uitgesaai en ook weer op Sondag 16 Oktober om 17:00.
• Coetzee het individue en instansies soos kerke, sportklubs, politieke partye, besighede en nie-regeringsorganisasies aangemoedig om by die interim-huis betrokke te raak deur geld, beddegoed of kruideniersware te skenk. Skenkings kan by die huis in Merrimanstraat 103 in George afgegee word of Coetzee kan by sel 082 598 7273 gekontak word sodat hy dit kan kom oplaai en na die huis neem. (Deur Liesel le Roux)