DIE Groter Oudtshoorn-raad gaan opnuut met die voorgeskrewe proses moet begin om ’n munisipale bestuurder aan te stel as gevolg van ’n oorsig rondom munisipale wetgewing.
Die raad het Walter Hendricks einde 2022 as munisipale bestuurder aangestel nadat die aansoekers vir die pos deur ’n paneel geëvalueer is.
Volgens Aurelia Mle, munisipale woordvoerder, is daar tydens die samestelling van dié aanwysingspaneel verlede jaar besluit om ’n veelpartypaneel saam te stel sodat die opposisie ook deel van die proses kon wees.
Klaarblyklik het dit daartoe gelei dat drie raadslede op die betrokke aantellingspaneel gedien het, en nie net twee soos die betrokke wetgewing aandui nie.
Die Wes-Kaapse minister van plaaslike regering, omgewingsake en ontwikkelingsbeplanning, Anton Bredell, het die raad intussen in kennis gestel dat die samestelling van die aanstellingspaneel nie aanvaarbaar is nie en gelas dat die aansoek- en aanstellingsproses van ’n munisipale bestuurder van voor af moet plaasvind.
Bredell het glo in ’n skrywe aan die raad uitgewys dat drie raadslede op die paneel gedien het terwyl munisipale wetgewing voorskryf dat net twee raadslede, die burgemeester en nog ’n raadslid, op so ’n paneel mag dien. Dit maak die aanstelling van Hendricks as munisipale bestuurder onreëlmatig is.
Mle sê die raad het Hendricks intussen as waarnemende munisipale bestuurder aangestel totdat die proses weer voltooi is. Die pos is reeds weer geadverteer vir aansoeke.
