Dam is nodig
Dankie dat die Wes-Kaapse provinsiale regering, Kannaland se uitgawes stopgesit het; na aanleiding van laas week se skrywes, want dis onnodige uitgawes vir ’n munisipaliteit wat R50 000 000 skuld het.
As die munisipaliteit ’n projek soos die bou van ’n ordentlike dam bo in die kloof – bokant die huidige waterwerke – sou aanpak, kon ’n mens dalk waag om vir hulle daarmee te help.
Die bou van ’n dam is al baie jare bespreek, maar nooit uitgevoer nie. Ons ly nou al sewe jaar onder ’n droogte. Die berg kry soms water, wat na opvangdamme onderkant die reservoirs is; en onderkant die plakkershuise.
Die munisipaliteit moes na die uitbreek van Covid-19 darem ’n firma huur vir die verskaffing en bedryf van toiletgeriewe, wat glo sowat R60 000 per maand kos. Droë toilette sou seker goedkoper uitwerk?
Maar as ons al ’n dam bo in die kloof had, kon die plakkers en al die inwoners van Nissenvile én die dorp dalk nog leiwater óók gehad het.
’n Dam is absoluut noodsaaklik, want die mense word al meer en meer.
– Fanie, Kannaland
Uitstekende diens by verkeer
Ek het vandag uitstekende diens van die Oudtshoorn Verkeersdepartement ontvang.
Ek is skielik gestremd en gebruik suurstof. By die deur het ’n vriendelike dame my dadik ingelaat en het mev Weyers my daarna gou gehelp. Hul was baie bedagsaam en kan net met lof van hul praat.
– Daleen Wolfaardt, Oudtshoorn
Puik dorp!
Ons het ’n puik dorp, hitte ten spyt – die mense, koerante en baie besienswaardighede, koffiewinkels en restaurante.
Kerke en skole tel onder die bestes.
Plaasboere, hoewel hul onder erge droogte moet funksioneer, hou steeds moed. Ek salueer hulle almal, onder ander vir Kobus Lategan – ’n merkwaardige man. Hy is die pa van suksesvolle kinders, en word eersdaags oupa van hul seun Jan en vroutjie Danielle se eersteling; en is ’n puik werkgewer wat werknemers laat deel in sy sukses.
– Magriet Coetzee, Oudtshoorn
