Bedruk en bedonnerd
As ’n Oudtshoorniet is ek erg beswaard om vanoggend te sien dat die 42ste Freda Barnard Swemgala op 8 Oktober in Conville, George aangebied word. Hoe gebeur dit dat hierdie jaarlikse gala wat ’n absolute instelling op Oudtshoorn se sportkalender was, sonder enige aanduiding onder ons oë en ore uit verdwyn? Sommer net so! Dié gala is ’n jaarlikse spoggeleentheid – 41 jaar lank was dit trots Oudtshoorn.
Iemand moet verseker verduidelik – hierdie is ’n groot terugslag vir die dorp se sportkalender. Wat is volgende – met deernis gevra?
Gegewe die ontstaan en geskiedenis van die gala dink ek nie dié merkwaardige dame, verdien dat haar gala enige plek anders as Oudtshoorn aangebied word nie, en dat sy verseker dit vanoggend in Oudtshoorn sou wou sien. ’n Klap in ’n baie merkwaardige Oudtshoorn-familie se gesig. Die gala is ’n groot Orca wat geval het.
Iewers, net iewers, sal die stadsvaders moet verantwoording doen oor die verrotting wat besig is om in te tree op senior politieke vlak in Oudtshoorn. ’n Mens kry die idee dat Oudtshoorn se politieke glaspaleis tans op leuens, tweespalt, trots, selfverheerliking, nepo- tisme en onstabiliteit gebou is en nie in belang van die inwoners nie. Oudtshoorn behoort aan die inwoners en nie stadsvaders nie. Stadsvaders is dienaars; nie eienaars nie.
Dit blyk dat daar ’n agenda is om die inwoners skuldig te laat voel oor die politieke situasie, deur voortdurend besorgde inwoners se klagtes en petisies met min belang te hanteer – byvoorbeeld die riooltariewe wat met Afriforum se hulp in die hof gaan draai het.
Bring die Freda Barnard-gala terug. Daar is reeds sprake dat dit 2023 weer in George aangebied gaan word.
Ek is onder korreksie – die jaarlikse Highgate Tweekamp word al 30 jaar in Oudtshoorn aangebied. Gaan die dorp dit ook verloor?
Te veel verskonings, te min dade.
Groete uit die Klein Karoo. My hartland.
– André Barnard, Oudtshoorn Die burgemeester, Chris Macpherson, reageer soos volg op die brief:
As burgemeester wil ek die publiek meedeel dat enige sportgeleentheid wat die dorp moontlik kan verloor as gevolg van swak beplanning of onvoldoende instandhouding van ons gerie- we uiters onaanvaarbaar is. Ek was reeds in gesprek met die komitee van Eden-swem om te probeer verseker dat die uiters belangrike Freda Barnard-swemgala volgende jaar na Oudtshoorn sal terugkeer.
Ek wil my opregte dank betuig aan lede van die publiek wat reeds self aangebied het om hand by te sit om die NA Smit-swembad op standaard te hou. Skenkings en die bereidwilligheid van individue en organisasies om te help, getuig van ’n positiewe gesindheid en begrip van die uitdagings waarmee die munisipaliteit moet omgaan.
Lede van die publiek wat graag hulp wil verleen en betrokke wil raak by ini-siatiewe om sportgeriewe te verbeter, kan kontak maak met Dave van der Walt van die Oudtshoorn Sportinisiatief (082 773 4901) of met Ian Laubcher van die munisipaliteit se sportraad (044 203 3976).
Waarom poste heradverteer?
Nou is die koalisie besig om onverantwoordelik met die belastingbetaler se geld om te gaan. Die twee poste waarna ek nou gaan verwys, word heradverteer. Wat is die rede? Was die mense wat hulle wil aanstel se aansoeke nie by nie?
Einde September is twee poste geadverteer: ’n bestuurder in die onderburgemeester se kantoor en ’n mediabe- ampte in die burgemeester se kantoor. Hulle verdien volgens die advertensie gesamentlik meer as R1 miljoen per jaar.
Volgens wetgewing is die pligte van die onderburgemeester om in te staan wanneer die burgemeester afwesig is en gevolglik is dit mos logies dat die burgemeester se bestuurder dan ook tot sy beskikking is. Hy het dus nie nodig om enige aanstellings in sy kantoor te maak nie. Om wat te doen?
Daar is reeds bekwame amptenare in hierdie poste wat gereeld via die media met die gemeenskap kommunikeer. Somtyds word van hom verwag om vanweë sy posisie en verantwoordelikheid self met die belastingbetalers te kommunikeer. Dit het hy tot nou goed gedoen en sy voorganger het selfs die radio en TV gebruik.
Wanneer hierdie twee poste gevul word, sal die belastingbetaler sien of daar ’n behoefte was.
Ten opsigte van behuising:
Die distriks-, provinsiale en nasionale regerings het te kenne gegee dat behuising nie meer ’n funksie van plaaslike regering is nie. Verstaan die Oudtshoorn-raad dat dit die ontbinding van die behuisingsdepartement beteken? Dié amptenare moet nou by ander afdelings geplaas word, anders kan die salarisse wat hulle kry sonder werk om te doen as vrugteloos beskou word.
As die burgemeester en sy raad erns-tig is met besparing, sal hulle bogenoemde ernstig opneem. So ook die ANC en sy vennote wat swyg soos ’n graf.
– Uitkoms van die Hoorn
Die waarnemende munisipale bestuurder, Gerald de Jager, reageer soos volg:
Ten opsigte van die eerste drie paragrawe van die brief:
Die politieke struktuur met ondersteuningsfunksies is deur die raad goedgekeur. Alle rolvertolkingsposte word dienooreenkomstig aangestel en gevul. Poste word gevul met die geskikte persone. Die her-advertering is gedoen om geskikte kandidate in daardie twee poste te kry.
Ten opsigte van die tweede deel van die brief:
Die munisipaliteit is voordurend in gesprek met alle rolspelers in die voorsiening van behuising. Die munisipaliteit is tans ook besig met herstrukturering. Tot die proses afgehandel is, kan daar nog nie kommentaar gelewer word nie. Behuising is ’n belangrike diensleweringbehoefte van gemeenskappe. Die munisipaliteit is voordurend in gesprek met die distrik-, provinsiale- en nasionale regering om almal se rolle uit te spel en verstaan. Tot almal se rolle uitgespel is, is dit moeilik om net te sê die behuisingsamptenare se salarisse moet gestaak word of hulle moet verskuif word na ander departmente.
