“DIE bottom line is, ons soek net kos vir Oudtshoorn se skut se diere.”
So sê die Oudtshoorniet en besorgde diereliefhebber Lydia Bothma na aanleiding van haar onlangse ervaringe by die Oudtshoorn Diereskut.
Lydia het onlangs as vrywilliger, sonder enige verbintenis aan enige diere- of nie-winsgewende organisasie, by die skut begin uithelp.
Sy vertel dat sy so drie weke gelede op ’n dag daar aangekom en self gesien het dat die diere byna geen kos gehad het nie.
“Dit is toe dat ek besluit het dat ek kos wil insamel en vir Oudtshoorn se mense en besighede wil vra om plaaslik betrokke te raak – nie deur finansiële donasies nie, maar bloot net met donasies van kos,” vertel sy passievol.
Tot dusver het ’n paar besighede by Lydia se insameling betrokke geraak.
“Die personeel van die besighede het self besluit wat om in te samel, en dan maak ek seker dat dit by Oudtshoorn se diere uitkom,” sê sy.
Enige persoon of besigheid wat betrokke wil raak, kan Lydia skakel by 083 437 3668. (Deur Stefan Skapie Goosen)
