DIE uitspraak van ’n hersieningsaansoek in ’n saak teen die voormalige hoofbestuurder van Kango Wyne op Oudtshoorn, Johan Brits, is geskeduleer vir volgende Donderdag, 28 Mei 2020.
Dié uitspraak in die Kaapse Hooggeregshof hieroor sou op 20 April plaasgevind het, maar is weens die Covid-19-inperking tot 28 Mei uitgestel. Brits het die hersieningsaansoek gebring nadat hy op 23 klagtes van bedrog en twee van oortreding van die Wet op Drankprodukte skuldig bevind is.
Hy het in sy hersieningsaansoek aangevoer streeklanddros Neels Nortje het fouteer in sy skuldigbevinding.
Regterpres John Hlope het op 12 Junie 2019 die saak na die Oudtshoorn Streekhof terugverwys vir afhandeling van vonnis, waarna Brits se regsverteenwoordiger, adv Marthinus Barnard, landdros Nortje oorreed het om ’n verlofaansoek te bring vir appèl teen die regter se reëling. (Deur Garnett Wicomb)
