Oudtshoorn RFC het Saterdag hul plek in volgende jaar se Premierliga met oortuiging verseker toe hulle ’n indrukwekkende oorwinning oor Riversdal Blues behaal het.
Dit was ’n dag van hoë gehalte rugby, waar beide spanne alles op die veld gelaat het, maar dit was uiteindelik Oudtshoorn se voorbereiding en deursettingsvermoë wat die verskil gemaak het.
Van die eerste afskop af was dit duidelik dat Oudtshoorn gereed was vir die uitdaging. Die span se harde werk en lang ure op die oefenveld het duidelik vrugte afgewerp, en hul spelpeil was deurgaans van ’n baie hoë standaard. Die punteleer weerspieël hul toewyding en opofferings deur die seisoen, en hierdie oorwinning het hul status as een van die dorp se gunsteling rugbyspanne verder bevestig.
Die dag se aksie het begin met die C-span wat eerste aan die beurt was. Hulle het met vasberadenheid gespeel en hul teenstanders met 32-22 geklop. Die span het goeie samewerking en vasbyt getoon, wat hulle die nodige voorsprong gegee het om die wedstryd te beheer en uiteindelik die oorwinning te beklink.
Daarna het die B-span oorgeneem en hul staal gewys met ’n dominante vertoning. Hulle het Riversdal Blues geen kans gegee nie en met ’n oortuigende 26-7 oorwinning van die veld gestap. Sterk verdediging en skerp aanvalle het die toon aangegee, en die span het gewys waarom hulle ’n krag is om mee rekening te hou.
Die A-span het die dag se vertonings op ’n hoë noot afgesluit met ’n skitterende oorwinning van 62-19. Hulle het die tempo van die wedstryd beheer en hul teenstanders met vaardigheid en dissipline oorrompel. Die span het nie net punte aangeteken nie, maar ook hul spelvernuf en spanwerk ten toon gestel, wat die toeskouers behoorlik beïndruk het.
Met hierdie uitslae het Oudtshoorn RFC hul plek bo-aan die punteleer verder verstewig. Alle oë is nou gerig op die komende naweek se wed-stryde, waar hulle sal probeer om hul posisie te behou en die seisoen op ’n hoogtepunt af te sluit.
Die span se prestasies is ’n bewys van hul harde werk, toewyding en liefde vir die spel. As hulle hierdie momentum kan behou, lyk die toekoms vir Oudtshoorn RFC besonder belowend.
Oudtshoorn het ook vir hulle tuis semi-finale verseker met die wen oor Riversdal Blues.
Hierdie prestasie om volgende jaar in die Premierliga te speel is ’n groot een vir hulle, want na 16 jaar sal hulle in die Primierliga speel. (GRANWILLE GOLIATH)