Die Oudtshoorn Ope jukskei- toernooi het die afgelope naweek spelers en ondersteuners bederf met ’n onvergeetlike mengsel van mededinging, kameraadskap en ware sportgees.
Van die eerste gooi tot die laaste wedstryd was dit duidelik dat hierdie geleentheid een van die hoogtepunte op die jukskei-kalender is.
Die verrigtinge het Vrydag afgeskop met opwindende dubbels-wedstryde waar spelers hul vaardighede ten toon gestel het. Die atmosfeer was ontspanne, maar tog kompeterend, en die dag is afgesluit met ’n gesellige braai waar lag, stories en nuwe vriendskappe gedeel is.
Saterdag het die fokus na spanwedstryde verskuif, en die bane het behoorlik geleef met energie en passie.
Spanne van verskeie klubs het mekaar die stryd aangesê, met elke speler wat hul beste gegee het om hul span trots te maak.
Die gees van jukskei was duidelik sigbaar in die sportmanskap en respek wat deurgaans getoon is. Verskeie spelers het besondere prestasies gelewer.
Hercules Kritzinger en Andile Mgulwa het ’n sterk tweede plek in die B-afdeling behaal en ook derde geëindig in die A-afdeling. Ivan en Ivanna Ellis het derde plek in die D-afdeling verower, terwyl Kinnie du Toit en Lulu Zeeman tweede in dieselfde afdeling geëindig het.
In die D-afdeling het Kinnie du Toit, Echbert le Roux, Magda Davel en Tim Scholtz eerste plek ingepalm. Verder het Anita, Lulu Zeeman, Antoinette van Wyk en Isma van Tonder derde plek in die B-afdeling behaal.
’n Groot woord van dank gaan aan al die klubs, spelers, skeidsregters en helpers wat hierdie toernooi moontlik gemaak het. Oudtshoorn sien uit daarna om almal volgende jaar weer te verwelkom vir nóg ’n besonderse jukskei-naweek. (GRANWILLE GOLIATH)