Bridgton RFC het Saterdag weer hul stempel op die plaaslike rugbyveld afgedruk toe al drie hul spanne indrukwekkende oorwinnings oor Multisure Crusaders behaal het.
Van die eerste afskop tot die laaste fluitjie het Bridgton se spelers vasberadenheid, vaardigheid en uitstekende spanwerk getoon – ’n prestasie wat ondersteuners trots laat huis toe gaan het.
Die dag het op ’n opwindende noot begin toe die C-span die voortou geneem het. In ’n taai en kompeterende wedstryd het hulle karakter getoon om met 27–22 as wenners uit die stryd te tree. Die oorwinning het die toon aangegee vir wat sou volg.
Daarna het die B-span die veld betree en geen twyfel oor hul oorheersing gelaat nie. Met skitterende aanvalsrugby, goeie balhantering en rotsvaste verdediging het hulle hul teenstanders met 52–14 oorskadu. Die span het die tempo van die wedstryd van begin tot einde beheer en hul ondersteuners met ’n puik vertoning beloon.
Alle oë was egter op die A-span gerig, waar die hoogtepunt van die dag gewag het. Bridgton se eerste span het met flair en selfvertroue gespeel en ’n indrukwekkende 46–26-oorwinning behaal.
Die span se vermoë om geleenthede in punte te omskep, gekombineer met hul gedissiplineerde verdediging, het die verskil gemaak. Hul aanvallende spel was kreatief en klinies, terwyl hul verdediging die Crusaders onder voortdurende druk gehou het.
Met hierdie oorwinnings uit die wedstryd het Bridgton RFC weereens bewys waarom die klub as een van die dorp se gewildste en sterkste rugbyspanne beskou word. Die spelers se toewyding, fiksheid en uitstekende samewerking is duidelik sigbaar in elke wedstryd. As Bridgton hierdie hoë standaard van spel kan handhaaf, lyk die res van die seisoen besonder belowend.
Ondersteuners kan met groot verwagting uitsien na nog opwindende wedstryde en uitstekende rugby van ’n span wat week ná week wys dat hulle gereed is om met die beste mee te ding. Die toeskouers is ook lekker Vermaak deur die Drilling en Marching band van Saturnus Primere Skool.
Die trompoppies van die skool en Sacred Heart het ook die toeskouers vermaak met hulle optredes. Bridgton sê dankie vir hulle bydrae vir die dag. (GRANWILLE GOLIATH)
Bridgton RFC maak skoonskip teen Multisure Crusaders
Foto verskaf