Die Oudtshoorn Besigheidskamer se maandelikse netwerkaand is Dinsdag, 22 September, gehou, met Pediatric Care Africa (PCA) as borg van die aand.
Abri Ferreira, voorsitter van die Oudtshoorn Besigheidskamer, het die aand geopen en die gehoor aangemoedig om doelbewus positief oor Oudtshoorn te bly en ook meer van die goeie dinge wat in die dorp gebeur op sosiale media te deel.
Hy het daarop gewys dat negatiewe plasings maklik die beeld van ’n dorp kan beïnvloed, terwyl positiewe stories en ervarings ook kan help om Oudtshoorn se beeld as toerismebestemming te versterk.
Ferreira het inwoners verder aangemoedig om op 4 November hul stem uit te bring wanneer Suid-Afrika se plaaslike regeringsverkiesing plaasvind.
KarooTax en BYD Oudtshoorn is tydens die aand ook as nuwe lede van die Oudtshoorn Besigheidskamer verwelkom.
Dr. André Hattingh van PCA het daarna die gehoor toegespreek en meer vertel oor die organisasie se werk, asook ’n komende projek wat in samewerking met die Oudtshoorn Vereniging vir Persone met Gestremdhede (APD) aangepak word.
Rashieda Booysen van APD Oudtshoorn het ook kortliks ’n oorsig gegee van die organisasie en die werk wat hulle in die gemeenskap doen. APD ondersteun kinders en volwassenes met gestremdhede in die streek deur onder meer ’n dagsorgsentrum, werkswinkel en verskeie ondersteuningsdienste.
Die organisasie fokus ook daarop om persone met gestremdhede groter deelname, ondersteuning en geleenthede binne die gemeenskap te bied.
Hattingh het meer besonderhede gedeel oor ’n opknappingsprojek wat van 19 Oktober tot 19 November by die APD-sentrum in Oudtshoorn aangepak word.
Die sentrum bied ondersteuning aan byna 100 persone met ernstige gestremdhede, en PCA doen ’n beroep op plaaslike besighede, organisasies en individue om by die projek betrokke te raak.
Die beplande werk sluit onder meer verfwerk, muurskilderye, nodige herstelwerk en verbeterings aan verskeie ruimtes in.
Besighede kan ook ’n kamer of spesifieke gedeelte van die sentrum borg, of ondersteuning bied deur materiaal, finansiële bydraes of praktiese hulp.
Die doel is om ’n warmer en meer funksionele omgewing te skep vir die kinders en volwassenes wat van die sentrum se dienste gebruik maak.
Belangstellendes wat by die projek betrokke wil raak, kan Joyce Hattingh by 076 229 5663 of Demorian Apollis by 081 086 1886 kontak.
Lees ook:
Local businesses invited to make a difference
APD nooi gemeenskap om betrokke te raak
Be the first to comment on "Besigheidskamer plaas fokus op gemeenskapsbetrokkenheid"