DIE Wes-Kaapse regering ondersteun nie die plasing van verkeersligte of vierrigtingstoptekens by die kruising van Baron van Reede- en Van der Rietstraat op Oudtshoorn nie.
Volgens Aurelia Mle, woordvoerder van die Groter Oudtshoorn Munisipaliteit, word in ’n verslag van die provinsie wat die munisipaliteit verlede week ontvang het, aanbeveel dat sigafstande op dié straathoek opgelos moet word.
Die Groter Oudtshoorn Munisipaliteit het egter aangedui hulle is vasbeslote om alternatiewe oplossings vir die talle botsings en verkeersdruk op dié kruising te ondersoek.
Die munisipaliteit bestudeer tans die verslag saam met hul raadgewende ingenieurs.
Hikkie Marais, ’n sakeman wie se besigheid naby dié straathoek geleë is en wat onlangs ’n vergadering met verskeie rolspelers by die straathoek gereël het, het sy steun vir die munisipaliteit se inisiatiewe uitgespreek.
“Ons wil saamwerk om die verkeersprobleem op die straathoek aan te spreek.
“Daar is baie inwoners wat daardie straathoek gebruik en inisiatiewe sal ondersteun.” (Deur Liesel le Roux)
Straathoek: Munisipaliteit ondersoek alternatiewe
Die kruising van Baron van Reede- en Van der Rietstraat op Oudtshoorn. Foto: Liesel le Roux