DIE verhoor van die bestuurder van die motor waarin Marilize Nortier (18) op 22 September 2019 buite Oudtshoorn gesterf het, Sidney Berry (25), is verlede Vrydag in die Oudtshoorn Landdroshof deur landdros Vaughn Shone tot 2 November uitgestel omdat Berry en sy regsverteenwoordiger in isolasie was. Berry staan tereg op klagtes van strafbare manslag, alternatiewelik roekelose of nalatige bestuur, en versuim om hulp by ’n ongelukstoneel te verleen.
Die motor waarin Nortier ’n passasier was, het die Kango Grotte-pad verlaat en in ’n watervoor beland. Nortier was in die voertuig vasgegordel toe dit ure later uit die water getrek is. Volgens ’n nadoodse ondersoek het sy verdrink. (Deur Garnett Wicomb)
