’n Deel van die versoeningsoptog van 2011.
’N OUD-SAKEMAN van Oudtshoorn en oud-voorsitter van die dorp se Besigheidskamer, Bennie de Wet (71), is Saterdag op Humansdorp ná ’n beroerte oorlede.
De Wet het aan terminale pankreaskanker gely en was onlangs op Oudtshoorn saam met sy vrou, Tersia, om vir haar ’n geskikte blyplek te vind omdat sy na sy dood wou terugkeer Oudtshoorn toe.
Die De Wets het enkele jare gelede na Humansdorp verhuis.
De Wet was op Oudtshoorn die eienaar van Bennie de Wet Finansiële Dienste en jare lank ’n aktiewe lid van die Besigheidskamer. Hy was van Februarie 2004 tot Februarie 2006 voorsitter van die kamer.
De Wet, ’n diep gelowige man, was ook jare lank saam met gemeenskapsleiers soos wyle David Piedt en Manuel Santi betrokke by pogings om eerlike en verantwoordelike dorpsbestuur daar te probeer stel.
Hulle drie was ook in November 2011 betrokke by die organisering van ’n historiese versoeningsoptog van sowat 800 Oudtshoorniete wat uit twee rigtings na die munisipaliteit gestap het om ’n memorandum aan die destydse burgemeester, Gordon April, te oorhandig en hul ontevredenheid te kenne te gee oor die wyse waarop die dorp in daardie stadium bestuur is.
Die optog is onder die vaandel van die Oudtshoorn Burgerlike Beweging georganiseer, wat gestreef het na die bevordering van geregtigheid, stabiliteit en versoening. Tydens die optog het inwoners uit die ooste uit die rigting van Bridgton en uit die weste uit die rigting van Wesbank as simbool van versoening voor die munisipaliteit by mekaar aangesluit.
’n Roudiens vir De Wet word Vrydag in die NG Kerk Humansdorp-Oos gehou.
Tersia het Maandag aan Die Hoorn gesê sy is bevoorreg dat al hul kinders – hul seun Conrad en twee dogters uit Australië, Benita Derbyshire en Yana Snyman – die week by haar op Humansdorp kan wees.
De Wet word ook oorleef deur ’n broer André wat vandeesweek die volgende huldeblyk aan sy ontslape broer op Facebook geplaas het: Rus in vrede, my broer. Jy was almal se go to man as ons raad nodig gehad het, het altyd die ander kant van die muntstuk ook raakgesien. Jy het ’n pad met die Here gestap wat vir ons almal ’n voorbeeld was. Jy was altyd positief, tot die einde toe. Ek gaan jou mis. (Deur Liesel le Roux)