Partye vra inwoners om saam te werk vir stabiliteit en vrede

DIE vyf politieke partye in die Groter Oudtshoorn-raad, die DA, ANC, Sarco, Icosa en EFF, het in­wo­ners in ’n gesamentlike ver­klaring gevra om saam te werk ter wille van vrede en stabiliteit in die dorpe in die munisipaliteit. Die verklaring het gevolg op verlede week se geweld en plundery in KwaZulu-Natal en Gauteng.

In die verklaring vra die vyf par­tye inwoners van Oudtshoorn, Dyselsdorp, De Rust en die omliggende landelike gebiede om seker te maak hulle stuur nie fopnuus aan nie omdat dit ’n strafbare oortreding is.

Die partye spreek hul waarde­ring uit vir die werk van wetstoe­passers, buurtwagte, die privaat- sekuriteitsbedryf, gemeenskaps­veiligheidsbeamptes en plaaswag­te om wet en orde te handhaaf, en onderneem om saam met inwo­ners te werk as verkose raadslede en openbare verteenwoordigers om wet en orde te handhaaf, die nodige leierskap te bied om kalm­te te skep en privaat-, openbare en munisipale eiendom te beskerm.

“Ons doen ook ’n beroep op al ons geloofsleiers in die Groter Oudtshoorn om ons te lei in gebed vir vrede en stabiliteit in ons land, provinsie en munisipaliteit.

Die verklaring is onderteken deur die hoofswepe van die DA (Hendrik Botha), ANC (Jongelizwe Tyatya) en Sarco (Gaven Juthe, namens Sarco, Icosa en die EFF), asook speaker Julia le Roux. (Deur Liesel le Roux)

Be the first to comment on "Partye vra inwoners om saam te werk vir stabiliteit en vrede"

Leave a comment

Your email address will not be published.


*