’n Jong man van Bongolethu wat ’n man van oor die vyftig van ’n bottel KWV brandewyn beroof het, is verlede week in die Oudtshoorn streekhof ’n boete van R30 000 of ses maande gevangenisstraf opgelê wat voorwaardelik vir vyf jaar opgeskort is.
Die 20-jarige Marshall Goliath het erken dat hy en ’n vriend op 1 Maart vanjaar vir Adriaan Baartman wat hulle goed ken dopgehou het toe hy na ’n bottelstoor gestap het. Toe hy terugkom het hy sy sak met die brandewyn gegryp.
Volgens hom het die “Oom” vir eers teengestribbel maar later die sak gelos.
Goliath sê hy en sy vriend het weggehardloop en die brandewyn uitgedrink.
Hy het verder erken dat hy verkeerd opgetree het en aanvaar sy straf.
Goliath se regshulpprokureur, Eugene Roos, het die hof versoek om sy ouderdom is ag te neem asook die feit dat hy skuldig gepleit het.
Staatsaanklaer, Anzelle Laubscher, het gesê dat Goliath ’n les geleer moet word en die hof ’n boodskap moet uitstuur om voornemende rowers af te skrik.
Streeklanddros Ntsoki Moni het Goliath aan roof gewoon skuldig bevind omdat geen wapen gebruik is nie.
Hy moet egter ’n vonnis opgelê word wat soos ’n swaard swaar oor sy kop hang en hom twee keer sal laat dink voordat hy weer so iets sal doen.
Hy is ook onbevoeg verklaar om ’n vuurwapen te besit. (Deur Garnett Wicomb)
