DIE vonnisoplegging van ’n voormalige polisieman van Oudtshoorn wat op 200 klagtes van die besit van kinderpornografie skuldig bevind is, is Maandag in die Oudtshoorn Streekhof vir nog ’n maand tot 14 Julie uitgestel. Die saak is uitgestel omdat ’n korrektiewe toesigverslag wat deur die verdediging aangevra is, nog nie ontvang is nie.
Dale Mackintosh (64) is daarvan aangekla dat hy in Desember 2018 in besit was van ’n film of publikasie wat uitbeeldings, beskrywings of tonele van kinderpornografie bevat.
Hy is in 2019 in hegtenis geneem nadat sy gewese vrou sy tabletrekenaar na die polisie geneem het nadat sy die foto’s op die rekenaar ontdek het.
Die staatsaanklaer, adv Michelle Weyers, het na die getuienis van ’n pornografie-deskundige van Pretoria, Mmaletjema Poto, die staat se saak gesluit en die hof vir Macintosh se skuldigbevinding op al die klagtes gevra.
Streeklanddros Daniel Boks het in sy uitspraak gesê Poto se getuienis was betroubaar en deurslaggewend en die staat het sy saak bo redelike twyfel bewys. Hy het Macintosh se getuienis dat hy die foto’s vir navorsing wou gebruik en die jeug wou beskerm, verwerp.
Macintosh, wat tans op Mosselbaai woon, is uit op waarskuwing. (Deur Garnett Wicomb)
