IS daar krake binne die ANC in die Groter Oudtshoorn? Dit was sedert verlede Donderdag die vraag op inwoners se lippe nadat ’n groep ANC-ondersteuners buite die munisipale gebou onder meer die aanstelling van die dorp se ANC-burgemeester, Chad Louw, bevraagteken het.
Who is the real mayor? het een plakkaat gelui. En ander: We voted not the province, en nog een eis werk: we voted we demand EPWP work now!
EPWP verwys na die regering se Expanded Public Works Programme wat tydelike werksgeleenthede vir mense bied.
’n Video met die plakkate se bewoording op, is onder meer op die Facebook-blad Openbaarmaking in Oudtshoorn geplaas. In die video is die betogers nie sigbaar nie.
Die Hoorn het ook anonieme boodskappe van inwoners ontvang dat sekere ANC-ondersteuners met die betoging druk op Louw probeer plaas het om vir hulle werk te gee.
Die Hoorn het ’n navraag aan Louw gestuur oor die betoging, of daar toestemming daarvoor gegee was en ook oor die bewerings van verdeeldheid en druk op hom om werk aan sekere mense te verskaf. (Deur Liesel le Roux)
Is daar verdeeldheid in plaaslike ANC?
