Vrouwees, gesondheid, bemagtiging en die lewe word op 21 November op Celebratio gevier wanneer dié granaatplaas se eerste vrouedag in samewerking met Die Hoorn aangebied word.
Dit beloof om ’n sielsverrykende dag te wees met formidabele sprekers en uitstallers asook heerlike eet- en drinkgoed.
Die ginekoloog en seksuoloog dr Marlena du Toit sal oor die mites en feite van seks en intimiteit praat, terwyl die skrywer Tania Smit haar lewenswyshede en ervarings sal deel.
Die uitstallers is die kunstenaar Glendine Chisholm, wat van haar pragtige ware en afdrukke sal saambring; en Annemarie le Roux, wat ’n werkskeppingsprojek in Mosselbaai begin het waar pragtige kunsfigure, juwele, krale en selfs kledingstukke uit afvalmateriaal en herwinbare lap gemaak word.
Volgens Annemarie, ’n oud-inwoner van Oudtshoorn, noem hulle dit “slow fashion”.
Grundheim bring hul uitsonderlike gins en Jakkalsvlei kom spog met hul La Perlé Rosé, wat dubbelgoud by die onlangse Rosé Rocks-toekennings gewen het.
Bederf jouself vir ’n slag en kom kuier saam op die plaas. Slegs 40 kaartjies is nog beskikbaar.
Om te bespreek, bel Marita by 0823356059, stuur ’n e-pos met jou kontakbesonderhede aan info@celebratio.co.za. Daar is ook ’n beperkte aantal kaartjies by Nostalgie op Oudtshoorn.
Slegs 40 kaartjies oor vir besonderse Vrouedag by Celebratio.
