Drie DA-raadslede bedank

DRIE DA-wyksraadslede van Oudtshoorn het gister (Woensdag) as raadslede bedank.

Dit beteken dat daar – waarskynlik eers in 2021 – drie tussenverkiesings in die Groter Oudtshoorn sal plaasvind waar inwoners nuwe raadslede sal kan verkies in die plek van Ewa Fortuin (Wyk 4 in Bridgton), Hendrik Ruiters (Wyk 5 in Bridgton) en Nellie Soman (Wyk 10 in Dysselsdorp).
Volgens Eleanore Bouw-Spies, DA-kiesafde­lingshoof vir Oudtshoorn, was die drie raadslede se bedanking nie ’n verrassing vir die party nie omdat hulle raads- en partyreëls en -regulasies oortree het. “Dié drie raadslede het tugstappe in die gesig gestaar omdat hulle agtereenvolgende raadsvergaderings misgeloop het. Hulle het ook in stryd met DA-koukusbesluite buite stemming in die raadsvergaderings gebly.”

Die drie raadslede asook ’n vierde DA-raadslid, Henry Human, het na bewering nie raadsvergaderings vroeër vanjaar bygewoon nie omdat hulle nie met die ander DA-raadslede wou saamwerk nie en na verneem word betrokke was by gesprekke oor samewerking met die ANC.

Dié vier raadslede het klaarblyklik die vorige burgemeester, Colan Syl­vester, ondersteun. Fortuin, Soman en Ruiters wat lede van Syl­vester se burgemeesterskomitee was, het hul portefeuljes verloor toe Macpherson hulle nie as lede van sy burgemeesterskomitee aangewys het nie. (Deur Liesel le Roux)