DIE Klein Karoo kon die week ’n sug van verligting slaak nadat goeie reën Sondagaand uitgesak het.
Volgens ons lesers se reënmeters is tussen 16 en 26 mm op Oudtshoorn gemeet; tussen 34 tot 38 mm op Calitzdorp, 27 mm in Ladismith by die wateraanleg en 31 mm elders; in De Rust 25 mm; 35 mm tot 40 mm tussen Klaarstroom en Willowmore; 36 mm in Gamka-Wes; 30 mm by Gamkaberg; 40 tot 55 mm in Groenfontein en 55 mm in Gamkaskloof (Die Hel).
Volgens Ntobeko Mangwengqwe, woordvoerder van die Oudtshoorn Munisipaliteit, het 30 mm reën in die opvangsgebied van die Raubenheimerdam, Oudtshoorn se drinkwaterdam, geval. Teen Dinsdag was die Raubenheimerdam 45,7% en die Mellvilledam 100% vol (5% van die Raubenheimerdam).
Die Tierkloofdam in Zoar het oorgeloop en die Nelsrivier in Groenfontein sterk gevloei. (Deur Liesel le Roux)
