Bo: Die twee getroue werknemers van Palm Oord op Oudtshoorn, Elbie Plaatjies (links) en Christo Booysen, in een van die oord se talle parke. Plaatjies is al ses en Booysen al 14 jaar by die onderhoud van die tuine en parke daar betrokke.
Een van die talle parke in die oord met ’n geplaveide paadjie wat inwoners lok vir ’n wandeling tussen die bome deur. Foto’s: Liesel le Roux
BY Palm Oord op Oudtshoorn, ’n residensiële veiligheidsoord, blom die lente veelkleurig in die talle tuine en parke wat deur die jare deur verskeie inwoners op oop ruimtes aangelê is.
Die parke is daar vir almal om te geniet, sê een van die inwoners betrokke, Alet Badenhorst.
Daar is oral geplaveide paadjies waar mense kan wandel, bankies om op te sit, tafeltjies versier met mosaïekteels, dammetjies met water vir die voëls en skilpaaie, baie kleur, baie detail en ’n verskeidenheid waterwyse plante wat tuis is in die droë en warm Klein Karoo.
Volgens Himine Botha, nog ’n inwoner, is die beginsel van deelname deur inwoners baie belangrik by die oord en is dit duidelik uit die wyse waarop ’n inwoner soos Adele Marais saam met dagbestuurslede en tuinwerkers die parke tussen die huise mooi maak en onderhou. (Deur Liesel le Roux)