’N LOODGIETERSFIRMA asook ’n siviele ingenieursfirma betrokke by die installering van die Blossoms-pyplyn na Oudtshoorn het reeds aan die werk gespring.
Volgens Chris Swart, senior bestuurder: water en riool, is ’n totaal van R50 miljoen reeds vir die projek van die nasionale Departement Water en Sanitasie (DWS) ontvang waarvan R35 miljoen bestee is aan hoofsaaklik die finalisering van die ontwerp van die pyplyn en die aankoop van die materiaal daarvoor. Die oorblywende R15 miljoen sal gebruik word om die eerste deel van die pyplyn vanaf die Oudtshoorn se kant te installeer.
Die materiaal wat gekoop en afgelewer is, sluit die pype in asook meganiese toerusting wat spesiaal vervaardig moes word. Die installering daarvan sal plaasvind sodra die pyplyn voltooi is.
Die projek is in die vroeë 2000’s deur die Oudtshoorn Munisipa-liteit geïnisieer. In 2018 egter het ’n noodwaterprojek as gevolg van die droogte afgeskop, met die doelwit om bestaande eksplorasie-boorgate by Blossoms as waterbron te begin gebruik. Die beraamde koste van die noodprojek is R100 miljoen.
Nog R50 miljoen is dus nodig om die projek te voltooi, hopelik met die hulp van die DWS of die Wes-Kaapse regering
Met die huidige beskikbare fondse van R15 miljoen sal sowat 6 km van die pyplyn geïnstalleer kan word – aanvanklik oor munisipale en regeringsgrond sowel as privaatgrond waar ooreenkomste met grondeienaars bereik is.
Nadat ooreenkomste verlede jaar nie met van die grondeienaars bereik kon word nie, het die munisipaliteit regsadvies ingewin en is ’n prokureur tans besig met ’n regsproses teen dié grondeienaars.
Volgens Swart hoop die munisipaliteit om ooreenkomste met die meeste grondeienaars buite die hof te bereik. (Deur Liesel le Roux)
