Die lede van die Prophetstyle Production & Unlimited Crew van Oudtshoorn is van links Duayne Stoffels, Nathan Lewis, Schapiro Michaels (leier), Lizel Sederstroom en Tarence Kammies. Foto verskaf
Deur Wyndham Ewerts
’N HIP-HOP-GROEP van Oudtshoorn, Prophetstyle Production & Unlimited Crew (PPUC), het besluit om hul stemme dik te maak teen misdaad en Saterdag ’n hip-hop-jeugontwikkelingskamp in Plettenbergbaai by te woon. Die tema vir die kamp was Hip-Hop against Crime, met bekendes soos DJ Ramone van die befaamde Prophets Of Da City-rapgroep, Oudtshoorn se eie Danny B, asook die TV-aanbieder MelRock wat die saamtrek bygewoon het.
Die doel van hierdie kamp was om eenheid teen misdaad in hip-hop-geledere te versterk.
“Misdaad is ’n erge euwel wat ons almal raak en daarom het ons groep besluit om betrokke te raak,” sê Shapiro Michaels, leier van PPUC.
“Hip-hop se wortels is diep gesetel in oorwegend agtergeblewe gemeenskappe waar hierdie elemente hul oorsprong het, en juis daarom het ons broederskap gevoel dat ons ’n wesenlike verskil kan maak.”
Verskeie groepe uit Plettenbergbaai en Knysna het deur digkuns, motiveringspraatjies en energieke danspassies bydraes gelewer.
“PPUC beoog om ’n soortgelyke jeugkamp in die nabye toekoms in Oudtshoorn aan te bied om die geveg teen misdaad voort te sit,” sê Michaels.