SA kry openbare vakansiedag vir munisipale verkiesing

Woensdag 4 November 2026 is amptelik tot ’n openbare vakansiedag in Suid-Afrika verklaar om kiesers die geleentheid te gee om aan vanjaar se plaaslike regeringsverkiesing deel te neem.

President Cyril Ramaphosa het die dag ingevolge die Wet op Openbare Vakansiedae tot ’n openbare vakansiedag regoor die land verklaar.

Die plaaslike regeringsverkiesing vind op dieselfde dag plaas, wanneer Suid-Afrikaners sal stem vir die verteenwoordigers wat hulle op munisipale vlak moet dien. Die Verkiesingskommissie (OVK) het reeds vroeër vanjaar sy nasionale veldtog vir die 4 November-verkiesing van stapel gestuur.

Ramaphosa het die verkiesingsdatum vroeër aangekondig nadat dit in oorleg met die minister van Samewerkende Regering en Tradisionele Sake en die OVK bepaal is. Die huidige termyn van munisipale rade wat tydens die verkiesing van 1 November 2021 verkies is, verstryk vanjaar.

Die nuwe vakansiedag is nie ’n permanente toevoeging tot Suid-Afrika se jaarlikse lys openbare vakansiedae nie. Dit is spesifiek vir 4 November 2026 verklaar in verband met die plaaslike regeringsverkiesing. Die Wet op Openbare Vakansiedae maak voorsiening daarvoor dat die president enige dag per proklamasie tot ’n openbare vakansiedag kan verklaar.

Kiesersregistrasie vir die plaaslike regeringsverkiesing het reeds gesluit. Kiesers wat onseker is oor hul registrasiestatus of waar hulle geregistreer is om te stem, kan steeds hul besonderhede deur die Verkiesingskommissie (OVK) se aanlyn kiesersportaal nagaan.

Aansoeke vir spesiale stemme open binnekort

Geregistreerde kiesers wat nie op verkiesingsdag by hul stemlokaal kan uitkom nie, kan in bepaalde omstandighede vir ’n spesiale stem aansoek doen.

Kiesers wat weens siekte, ’n gestremdheid, swangerskap of ’n fisieke beperking nie na hul stemlokaal kan reis nie, kan vir ’n huisbesoek aansoek doen. Geregistreerde kiesers wat om ander redes nie op verkiesingsdag by hul stemlokaal kan stem nie, kan ook aansoek doen om vooraf by die stemlokaal waar hulle geregistreer is, te stem.

’n Spesiale stem is nie outomaties beskikbaar nie. Kiesers moet binne die OVK se bepaalde aansoektydperk daarvoor aansoek doen en goedkeuring ontvang voordat hulle ’n spesiale stem kan uitbring.

Aansoeke vir spesiale stemme open op 21 September en sluit op 12 Oktober om 17:00. Spesiale stemme sal op 2 en 3 November uitgebring word.

Aansoeke kan onder meer aanlyn deur die OVK gedoen word of kiesers kan ook hul ID-nommer per SMS na 32249 stuur.