SA Padfiets Jeugkampioenskappe bring ryers van heinde en verre

BO: Hierdie drie o.17-seuns het vir groot opwinding gesorg tydens Maandag se kriterium-fietsrenne in Bridgton. Hulle het vir byna die hele 35 minute van die fietsren op mekaar se hakke gesit, en konstant plekke geruil. Foto: Stefan Skapie Goosen ONDER: Die Wes-Kaapse minister van Kultuursake en Sport, Anroux Marais (middel) saam met die wenners van Saterdag se o.17-individuele tydtoetse: Travis Rademan-Ludeke (links) en Jessie Munton. (Foto verskaf)

DIE Suid-Afrikaanse Padfiets Jeugkampioenskappe van die naweek het jong fietsryers van regoor Suid-Afrika na Oudtshoorn gebring, en so ook aksie na die strate van Bridgton.

Die kampioenskappe, aangebied deur die Eden Fietsryvereniging, het sedert Saterdag in en om Oudtshoorn plaasgevind en het ’n individuele tydtoets, padfietsren en kriterium-fietsren ingesluit.

Ryers van die Wes-Kaap, Oos-Kaap, Gauteng, Vrystaat, KwaZulu-Natal, Mpumalanga en ook Eden het aan die kampioenskappe kom deelneem.

Jessie Munton, o.17-meisies fietsryer wat vir die Wes-Kaap ry, het die naweek oorheers en stof in al haar teenstanders se oë geskop. Sy het met die louere in al die o.17-meisies fietsrenne weggery.

• Tydtoetswenners, Saterdag (19 Maart): o.11 – Isabella Stermin (meisies, Wes-Kaap) en Herman Oelschig (seuns, Vrystaat); o.13 – Jennah Jacobs (Gauteng) en Tristan McGiven (Wes-Kaap); o.15 – Nadia van Wyk (Wes-Kaap) en Josh Johnson (KwaZulu-Natal); o.17 – Munton en Travis Rademan-Ludeke (Gauteng).

• Padfietsrenwenners, Sondag (20 Maart): o.11 – Leone Theron (Wes-Kaap) en Dian Jacobs (Vrystaat); o.13 – Jennah Jacobs (Gauteng) en Tristan McGiven (Wes-Kaap); o.15 – Nadia van Wyk (Wes-Kaap) en Josh Johnson (KwaZulu-Natal); o.17 – Munton en Gustav Roller (Gauteng).

• Kriteriumwenners, Maandag (21 Maart): o.11 – Leone Theron (Wes-Kaap) en Dian Jacobs (Vrystaat); o.13 – Jennah Jacobs (Gauteng) en Tristan McGiven (Wes-Kaap); o.15 – Nadia van Wyk (Wes-Kaap) en Josh Johnson (KwaZulu-Natal); o.17 – Munton en Matthew Symm (Gauteng).

Uitslae: www.edencycling.co.za. (Deur Stefan Skapie Goosen)

Tonele van Maandag, 21 Maart se kriterium-fietsrenne in die strate van Bridgton, Oudtshoorn. Hierdie item was die derde en laaste dag van die Suid-Afrikaanse Jeug Padfietskampioenskappe. Foto’s: Stefan Skapie Goosen