Jeug, eenheid en sokkergees vier hoogty by Mandela Dag-toernooi

Die derde Jaarlikse Mandela Dag Sokkerfees in Lategansvlei het op 18 Julie 2026 nie net vir opwindende wedstryde gesorg nie, maar ook die ware gees van eenheid, gemeenskap en jeugontwikkeling op ’n besondere wyse uitgelig.

Hierdie jaarlikse gebeurtenis, wat al hoe groter word, is met groot sukses aangebied deur Build it Oudtshoorn, OLFA (SAFA Eden), Alpha FC Odn, die Infantrie Skool Junior Sokker klub en 1FC Union Lategansvlei.

Spanne van regoor Oudtshoorn, Dysselsdorp en Mosselbaai het deelgeneem, wat ’n diverse en mededingende toernooi verseker het. Elke wedstryd het bygedra tot ’n algehele punteleer, wat die spanning tot die einde toe laat oplaai het. Ná strawwe en passievolle kompetisie het Young Stars FC as die goue wenners uit die stryd getree met ses punte.

Alpha FC Odn en die Infanterie Skool Junior Sokkerklub het die silwer posisie gedeel met vyf punte elk, terwyl 1FC Union Lategansvlei die bronsposisie met drie punte beklee het.

Benewens spanprestasies het individuele spelers ook hul stempel afgedruk. Amkele Mthi en Sakhumzi Gosa van Ince Stars FC is as die doelwagters van die toernooi aangewys vir hul uitstekende verdedigende werk tussen die pale.

Thabo Mahofa van Alpha FC Odn het die eer van topdoelskieter ontvang, terwyl sy spanmaat Onenjongo Mvimbi as speler van die toernooi bekroon is vir sy uitstaande spel en leierskap op die veld.

Die toekenning vir goeie sportmangees is aan Othawe van Young Stars FC oorhandig, en Curtwin Meyer van Arsenal FC is erken as die mees gedissiplineerde en respekvolle speler. Die jongste deelnemer, Inathi Mageduka van Ince Stars FC, het ’n spesiale toekenning ontvang in die vorm van ’n paar skoolskoene – ’n gebaar wat groot waardering ontlok het.

Die sukses van die dag kan egter nie net aan die spel op die veld toegeskryf word nie. Die geleentheid is gekenmerk deur besondere gemeenskapsbetrokkenheid.

Inwoners van Lategansvlei, veral ouers en families, het hande gevat om kos voor te berei en ondersteuning te bied aan spelers, afrigters en besoekers. Hierdie gebare van omgee en samewerking het die ware betekenis van Mandela Dag – diensbaarheid en gemeenskapsgees – lewendig gemaak.

Build it Oudtshoorn het spesiale erkenning ontvang vir hul ruim borgskap en betrokkenheid, terwyl OLFA (SAFA Eden) bedank is vir hul volgehoue ondersteuning en toewyding tot die ontwikkeling van jeugsokker in die streek.

Die organiseerders het hul opregte dank uitgespreek teenoor alle borge en gassprekers wat hul tyd afgestaan het om die dag by te woon en te ondersteun.

’n Spesiale woord van waardering is gerig aan Gabriel Majolla, voorsitter van OLFA, en Kreolan Pillay van Build it se hoofkantoor, vir hul rol in die bevordering van jeugsport.

Verdere dank is uitgespreek teenoor Colleen en Ava Kehl, Werner en Mariska Kemp, Lundi Joxo, en Talia Le Fleur vir hul betrokkenheid. Die bydraes van Marlo Jones, Immanuel en Patience Mawela, Thabisa Le Fleur en die Kehl Catering-span is ook met groot waardering erken. Daarbenewens is mnr. en mev. Giyama, kapt. Ndlumbini en kapt. Shane en Terri Jordan bedank vir hul ondersteuning en teenwoordigheid.

Ten spyte van uitdagings soos onlangse vloede in die omgewing, het die gemeenskap saamgestaan en die dag in ’n viering van hoop, volharding en samehorigheid omskep.

Die organiseerders het hul diepe dank uitgespreek teenoor almal wat agter die skerms gewerk het – van dié wat skoongemaak en gekook het tot dié wat na die kinders omgesien het.

Die Mandela Dag Sokkerfees in Lategansvlei het weereens bewys dat sport veel meer is as net kompetisie. Dit is ’n kragtige instrument wat gemeenskappe verenig, jongmense inspireer en hoop vir die toekoms skep. (GRANWILLE GOLIATH)

• 
• 
• 
•