Deur Ben du Preez
DIE Bridgton Rugbyklub se eerste span het Saterdag (3 Junie) onkeerbaar voortgestoom na die uitspeelrondes van die SWD Premierliga met ’n wegholoorwinning van 76-21 oor die eerste span van NMMU.
Met sy bonuspuntoorwinning het Bridgton op-geskuif na die tweede plek op die punteleer van die Premierliga en Evergreens afgedruk na die derde plek. Bridgton is nou met 38 punte vyf punte agter Progress wat met 43 punte voorloop. Evergreens het nou 36 punte en Barbarians 32 punte.
Bridgton speel Saterdag teen Barbarians.
Bridgton se haastige vleuel, Bradwin Wanies, het Saterdag vier van sy span se twaalf drieë gedruk terwyl die woelige skrumskakel, Gino van Vuuren, twee keer agter die doellyn gaan kuier het.
Hershelle America (heelagter), Granfried May (senter), Cristopher Snyman (senter), Charlston Ewerts (vleuel), Wayne Julies (flank) en Anver Venter (plaasvervanger-heelagter) het elk een drie gedruk. Van Vuuren het sewe van die drieë verdoel en Venter een.
• Bridgton se tweede rugbyspan het vir ’n nog groter drieëfees gesorg toe hulle die tweedes van NMMU met 94-7 vermorsel het. Dié wedstryd het altesame 15 drieë opgelewer.
Vir Bridgton het Altheano Matolla (plaasvervangerflank) drie drieë gedruk. Ronald Bratz (agtsteman), Gregory Agulhas (flank) en Mercayvin Micheals (heelagter) het elk twee drieë gedruk, en Kurt Rhode (vleuel), Duzil Avontuur (vleuel), Henk Toise (slot), Winston Mei (senter) en Rode-rick January (skrumskakel) elk een drie.
Jacques Julies, losskakel, het ses drieë verdoel, Lavano Nathan (plaasvervanger-losskakel) vier en Warren Malgas (plaasvervangerskrumskakel) twee.
• Bridgton se derde rugbyspan het NMMU met 35-5 geklop. Leroy Nimrod (senter) het twee drieë gedruk en Geraldo Cupido (vleuel), Cheslin Wagenaar (flank), Altheano Matolla (flank) en Autige Tiemie (plaasvervangervleuel) een drie.
Leroy Nimrod (senter) en Brain Jonathan (plaas-vervangerheelagter) het elk twee drieë verdoel.
Bridgton se volgende wedstryd is op Saterdag 10 Junie 2017 teen Barbarians RVK in Mosselbaai.