Bridgton RFC het Saterdag op Groot-Brak se tuisveld ‘n ware rugbydrama beleef toe die klub se B en C spanne teleurstellende nederlae uiteindelik deur hul A-span gered is met ‘n opwindende 44-38 oorwinning oor Groot-Brak RFC.
Die wedstryddag het allesbehalwe volgens plan begin. Bridgton se C-span het vroeg vasgeval teen ‘n goed afgeronde Groot-Brak-span wat met fisieke spel en goeie balbeheer die tuisspan onder geweldige druk geplaas het. Die tuis het van die eerste fluitjie af die tempo bepaal en Bridgton geen kans gegun om momentum op te bou nie. Die eindtelling van 24-0 was ‘n harde les vir die jong span.
Die spanning het verder toegeneem toe die B-span die veld betree. Anders as die C-span het Bridgton met groot vasberadenheid gespeel en die wedstryd het in ‘n titaniese stryd ontaard. Albei spanne het mekaar met kragtige verdediging en aanvallende spel beantwoord. Die voorsprong het verskeie kere gewissel en die uitslag het tot die laaste minuut in die weegskaal gehang. Ongelukkig het Groot-Brak met ‘n laat strafskop die wedstryd 15-14 beklink en Bridgton met ‘n bitter naelskraapse nederlaag gelaat.
Met die druk nou vierkantig op die skouers van die A-span, was daar net een doel – herstel die klub se trots. Die besoekers het dié uitdaging met albei hande aangegryp. Van die afskop af was die intensiteit merkbaar, met harde duikslae, blitsvinnige aanvalle en uitstekende spanwerk wat die skare telkens op hul voete gehad het.
Groot-Brak het egter gewys waarom hulle as gevaarlike teenstanders beskou word en het deurentyd teruggeslaan. Die twee spanne het mekaar drie vir drie beantwoord in ‘n wedstryd wat tot die laaste oomblikke op die mespunt gebalanseer het.
Toe dit die meeste saak gemaak het, het Bridgton se ervaring en veggees die deurslag gegee. Met kliniese afronding en vasberade verdediging het hulle die wedstryd met 44-38 gewen.
Hoewel die dag met teleurstelling begin het, het die A-span se heldhaftige vertoning bewys dat Bridgton RFC oor die karakter en deursettingsvermoë beskik om onder druk op te staan. Die oorwinning was nie net vier ligapunte werd nie, maar ook ‘n sterk boodskap dat Bridgton nooit afgeskryf moet word wanneer die eindfluitjie nog nie geblaas het nie.