Lisa Victor. Foto verskaf
Deur Liesel le Roux
NADAT sy by die Hoërskool Oudtshoorn se prysuitdeling verlede jaar aangewys is as die matriekleerder wat die beste deur haar hoërskoolloopbaan presteer het, het Lisa Victor nie teleurgestel nie en ses vakonderskeidings en ’n gemiddelde persentasie van 85,1% in die matriekeindeksamen behaal.
Sy spog met A-gemiddeldes in Afrikaans huistaal, Engels eerste addisionele taal, rekenaartoepassingstegnologie, lewenswetenskappe, Duits en lewensoriëntering.
Lisa het reeds na die Universiteit van Noordwes (Potchefstroom-kampus) vertrek waar sy vanjaar in die regte gaan studeer.
Dié veelsydige Lisa wat baie lief is vir sing en om kreatief te wees, was in haar matriekjaar lid van die matriekraad, redakteur van die skoolkoerant en tesourier van die VCSV.
Sy is die dogter van Heinrich en Lianda Victor wat pas van Oudtshoorn na Port Elizabeth verhuis het nadat Heinrich ’n pos as operasionele bestuurder vesel by die OVK aanvaar het. Lianda was tot einde 2017 ’n onderwyser by die Hoërskool Oudtshoorn.