Motoriste gaan van Woensdag, 7 Oktober, aansienlik meer by die pompe betaal, met die prys van 95-oktaanpetrol wat met R3,33 per liter styg.
Die Departement van Minerale en Petroleumhulpbronne het Maandag, 5 Oktober, die jongste brandstofprysaanpassings aangekondig.
Die aanpassings is:
- Petrol 93: styg met R3,12 per liter
- Petrol 95: styg met R3,33 per liter
- Diesel 0,05% swael: styg met sowat R2,84 per liter
- Diesel 0,005% swael: styg met sowat R3,24 per liter
- Verligtingsparaffien, groothandel: styg met R3,58 per liter
- LP-gas: styg met 48c per kilogram in die Wes-Kaap.
Volgens die departement is die skerp styging hoofsaaklik die gevolg van hoër internasionale olie- en petroleumprodukpryse. Die gemiddelde Brent-ruolieprys het gedurende die hersieningstydperk van $87,89 tot $101 per vat gestyg.
Die departement skryf die styging onder meer toe aan voortgesette spanning tussen die VSA en Iran, onsekerheid oor die vloei van olie deur die Straat van Hormuz, hoër verskepingskoste en laer internasionale voorraadvlakke.
Die rand het gedurende die tydperk effens teenoor die Amerikaanse dollar versterk, maar dit was nie genoeg om die groot styging in internasionale brandstofpryse te verreken nie.
Die departement sê hy hou steeds brandstofbeskikbaarheid, voorraadvlakke, invoere, raffinaderybedrywighede en logistiek in samewerking met die bedryf dop.
Be the first to comment on "Groot brandstofprysverhoging tref motoriste Woensdag"