Llewayden Jacobs (links), jong trompetspeler van Oudtshoorn, voor sy vertrek verlede week na Duitsland. Hy is hier saam met die leier van die Lutherse Jeugbrigade, kapt David Julius. Foto: Garnett Wicomb
Deur Garnett Wicomb
’N VOORSLAG-TROMPETBLASER van die Oudtshoorn Lutherse Kerk Jeugbrigade, Llewayden Jacobs (18 ), is tans op besoek aan Duitsland waar hy verskeie gemeentes sal besoek en die jaarlikse Kirchentag, ’n baie groot kerkbyeenkoms, sal bywoon. Llewayden bespeel ook die trompet vir die kerk se senior blaasorkes.
Die besoek is volgens Pat Sambo, sinodale verteenwoordigder van die Oudtshoorn Lutherse Kerk, ook deel van die kerk se internasionale vieringe van 500 jaar van Hervorming.
“Llewayden sal die Oudtshoorn Parogie, die Moria Kring, die Kaap- Oranje Bisdom en die Lutherse Kerk in Suid-Afrika verteenwoordig.”
Llewayden is een van vier jong Suid-Afrikaanse musikante wat die eer te beurt geval het, en sal onder meer ook Berlyn, Greifswald, Löcknitz Koserow en die Baltiese See besoek. Die Kirchentag sal in Greifswald plaasvind.
Volgens Sambo is die tema van vanjaar se byeenkoms Now is the time of grace – in which society do we want to live.
Lluwayden sal by die Kirchentag aan ’n musiek-werkswinkel deelneem en ook getuig oor wat die tema beteken vir ’n jeugdige Suid-Afrikaner.
Hy sal saam met jongmense van Tanzanië, Pole, Swede en Noord-Amerika optree en ’n musiekopvoering, Martin Luther in Word and Music, bywoon voordat hy na Suid-Afrika terugkeer.
Volgens kapt David Julius, leier van die Oudtshoorn Lutherse Kerk Jeugbrigade, is hy baie trots op die jong trompetblaser wat hom aanvanklik self geleer het voordat hy later onderrig van Klaus Claassen ontvang het.
“Llewayden is ’n toegewyde lid van die brigade en ’n voorbeeld vir almal,” sê Julius.
Hy is ’n Graad 12-leerder aan die Hoërskool Môrester en het voor sy vertrek gesê hy kan nie glo wat hom te beurt geval het nie.
Hy was in Graad 2 toe hy by die brigade aangesluit het en het eers die tromme bespeel voordat hy na die trompet oorgeslaan het. Hy bespeel ook die tromboon (skuiftrompet) en tuba.