Warmer, droër maande kan voorlê vir Klein Karoo

Inwoners van die Klein Karoo kan hulle moontlik vir warmer en droër maande gereedmaak nadat die Suid-Afrikaanse Weerdiens (SAWS) gewaarsku het dat ’n baie sterk El Niño ontwikkel en groot dele van die land in die komende maande kan beïnvloed.

Volgens die SAWS dui die jongste seisoenale vooruitsigte daarop dat ondergemiddelde reënval en bogemiddelde temperature van Oktober tot Desember oor die grootste deel van Suid-Afrika die waarskynlikste scenario is. ’n Soortgelyke patroon word vir November tot Januarie verwag. Dit kan veral van belang wees vir die Klein Karoo, wat reeds as ’n waterskaars gebied beskou word.

Volgens die Groter Oudtshoorn Munisipaliteit se waterhulpbronprofiel ontvang die streek gemiddeld sowat 280 mm tot 360 mm reën per jaar, terwyl bestaande waterbronne nie altyd voldoende is om aan die gebied se waterbehoeftes te voldoen nie.

El Niño ontstaan wanneer see-oppervlaktemperature in die sentrale en oostelike tropiese Stille Oseaan warmer as normaal word en dit kan weerpatrone oor groot dele van die wêreld beïnvloed.

Die SAWS sê die huidige El Niño kan verder versterk en moontlik een van die sterkste wees wat nog aangeteken is. Die jongste weeklikse see-oppervlaktemperature is reeds hoër as die vlak wat ’n baie sterk El Niño aandui.

Sterk El Niño-verskynsels word in Suider-Afrika dikwels met minder reën en warmer temperature verbind. Die El Niño’s van 1982/83 en 2015/16 het byvoorbeeld met wydverspreide droogtetoestande in die streek saamgeval.

Die SAWS waarsku egter dat ’n sterk El Niño nie noodwendig beteken dat droogte sal voorkom nie. Die baie sterk El Niño van 1997/98 het trouens met effens bogemiddelde reënval in dele van Suid-Afrika se somerreënvalgebied saamgeval. Die moontlikheid van warmer toestande bly egter ’n bron van kommer.

Indien die verwagte ondergemiddelde reënval wel realiseer, kan hittegolwe volgens die SAWS meer gereeld voorkom en moontlik ernstig wees.

Die weerdiens sê daar is steeds onsekerheid oor presies hoe sterk die huidige El Niño uiteindelik sal wees en watter invloed dit op individuele streke sal hê. Die situasie, insluitend die moontlikheid van hittegolwe en waterskaarste, sal daarom voortdurend gemonitor word.

Die SAWS het die publiek en bedrywe wat sterk van die weer afhanklik is, aangeraai om die maandelikse seisoenale vooruitsigte en korttermynweervoorspellings dop te hou.

• 
• 
• 
•