Rybewyssaak 3 maande uitgestel

DIE staat se versoek om die bedrog- en korrupsiesaak teen ses beamptes van die Oudtshoorn verkeersdepartement en vyf van twee bestuurskole vir verdere ondersoek vir nog drie maande uit te stel, is Vrydag (29 April) in die Oudtshoorn Landdroshof toegestaan.

Die saak, wat handel oor die beweerde onwettige uitreiking van leerling- en bestuurslisensies, is uitgestel tot 29 Julie.

Die 11 verdagtes – Noloyizo Tose, Thabo Mga­ba, Sandile Johnson, Ingrid Wagenaar, Ivan Hu­man, Warren Coetzee, Yolande Stalmeester, Phu­­mezo Tshomiso, Samuel van Hansen, Promi­ses Sovasi en Xolile Gaya – staan tereg op klagtes van bedrog, korrupsie, geldwassery en oortreding van die padverkeerswet.

Die staatsaanklaer, adv Deolin Willemse van die kantoor van die Direkteur van Openbare Vervolging, het verduidelik dat forensiese en selfoonverslae nog verkry moet word vir verdere ondersoek.

Landdros Graehymme Williams het sy kommer uitgespreek oor die lang uitstel voordat met die verhoor begin kan word, maar gesê hy wil nie die staat in ’n moeilike posisie plaas deur die versoek te weier nie. (Deur Garnett Wicomb)

Be the first to comment on "Rybewyssaak 3 maande uitgestel"

Leave a comment

Your email address will not be published.


*