Van Oudtshoorn se woonbuurte tot Dysselsdorp, De Rust en die omliggende plaasgebiede – die Groter Oudtshoorn is in 13 munisipale wyke verdeel. Elke wyk het ’n verkose wyksraadslid wat die gemeenskap in die munisipale raad verteenwoordig. Die wyke dek veel meer as net Oudtshoorn se dorpsgebied:
- Kliplokasie, Volmoed, die SANW-omgewing en aangrensende westelike dele van Oudtshoorn.
- De Jager-sportkompleks, South Cape College se omgewing, Rodewal en Lategansvlei.
- Welgeluk, Oudtshoorn Sekondêr, Oudtshoorn Vaardigheidskool en omliggende dorpsgebiede.
- Omgewing van Fezekile Sekondêr en die Queen of Peace-Katolieke kerksaal, in dele van Bongolethu en Bridgton.
- Sonskynhoekie, Smartie Town en die omgewing van Bridgton Sekondêr.
- Rosevalley en die omgewing van die Bridgton-gemeenskapsaal.
- Oudtshoorn-Noord, Laurus Primêr, Nicolania-saal, dele van Bridgton en ’n gedeelte van die De Jager-sportkompleks se stemdistrik.
- Bongolethu, Fezekile Sekondêr en die omgewing van die Verenigde Gereformeerde Kerk, met aangrensende dele van Bridgton.
- Dele van Dysselsdorp, waaronder Kolping House en Dysselsdorp Sekondêr, Stolsvlakte en gedeeltes van die Rosevalley- en PJ Badenhorst-stemdistrikte.
- Dele van Dysselsdorp, waaronder PJ Badenhorst Primêr en die Dysselsdorp-gemeenskapsaal, asook ’n gedeelte van die Kammanassie-stemdistrik.
- Blomnek, Vlakteplaas, Grootkraal, Groot-kruis, Nelsrivier en De Rust-omgewing.
- Neppon, Rooiheuwel, Welbedacht, Zeekoegat, Klipdrif, Kammanassie en die omgewing van die munisipale tegniese depot.
- Dele van Bridgton, waaronder Bergsig Primêr en die VGK Oudtshoorn se omgewing.
Hierdie beskrywings bied ’n algemene oorsig op grond van die jaarverslag; die amptelike wykskaarte bepaal die presiese grense.
Omdat woonbuurte soos Bridgton en Toekomsrus oor verskeie wyke strek, beteken ’n woonbuurtnaam alleen nie noodwendig dat al sy inwoners in dieselfde wyk val nie. Vir die komende plaaslike verkiesing moet inwoners hul adres teen die finale verkiesingsindeling nagaan.
Hoekom het elke wyk ’n raadslid?
Elke wyk het ’n wyksraadslid sodat inwoners iemand het wat hul gebied in die munisipale raad verteenwoordig. Met die verkiesing stem inwoners vir ’n kandidaat in hul wyk.
Die kandidaat met die meeste stemme word die wyksraadslid. Dié raadslid is die skakel tussen die inwoners en die munisipaliteit. As daar probleme met water, straatligte, paaie of vullisverwydering is, kan inwoners die raadslid nader om die saak onder die munisipaliteit se aandag te bring en op te volg.
Die raadslid herstel nie self die probleem nie, maar help om inwoners se klagtes en behoeftes aan die munisipaliteit oor te dra en terugvoer te kry.
Jou wyksraadslid is daar vir almal: Jy kan jou wyksraadslid nader, selfs al het jy vir ’n ander kandidaat of politieke party gestem.
Die wenner verteenwoordig almal in die wyk, en nie net die mense wat vir hom of haar gestem het nie. Jou politieke keuse verander dus nie jou reg om probleme te opper of terugvoer te vra nie.
Wat is ’n PR-verteenwoordiger?
Die munisipale raad bestaan uit wyksraadslede en PR-verteenwoordigers. PR staan vir proporsionele raadslid.
Waar jy op die wykstembrief vir ’n persoon stem, stem jy op die plaaslike PR-stembrief vir ’n politieke party. Elke party het vooraf ’n lys kandidate. Volgens die verkiesingsuitslag kry die party ’n aantal plekke in die raad. Die wyke wat die party reeds gewen het, word in dié berekening ingereken. Die oorblywende plekke word uit sy kandidatelys gevul – dit is die party se PR-verteenwoordigers.
Byvoorbeeld: As ’n party volgens die berekening agt plekke in die raad moet kry en reeds vyf wyke gewen het, kry hy nog drie PR-verteenwoordigers. ’n Party kan ook PR-verteenwoordigers hê al het hy geen wyk gewen nie. ’n PR-verteenwoordiger het nie ’n eie wyk waarin inwoners hom of haar direk verkies het nie, maar neem saam met wyksraadslede besluite oor die munisipaliteit se begroting, dienste en ontwikkeling.
Die verskil is dus eenvoudig: ’n Wyksraadslid word deur kiesers in ’n bepaalde wyk verkies. ’n PR-verteenwoordiger kry ’n plek deur ’n party se kandidatelys, op grond van die verkiesingsuitslag. Albei dien in dieselfde munisipale raad.
Waar pas jy as kieser in?
Jou stem help bepaal wie jou wyk verteenwoordig en watter partye in die raad dien. Nes raadslede ’n verantwoordelikheid teenoor die gemeenskap het, het jy as inwoner ook ’n verantwoordelikheid om te stem en jou stem te laat hoor.
As jy kies om nie te stem nie, laat jy ander namens jou besluit – en kan jy kwalik kwaad wees oor ’n uitslag wat jy nie help bepaal het nie. Jou rol eindig egter nie by die stembus nie: vra vrae, meld probleme aan en hou jou raadslede aanspreeklik.
Be the first to comment on "Oudtshoorn se 13 wyke: Waar pas jy in?"