Kannaland skuld Eskom R35 miljoen

HOEWEL slegs 3% van die skuld van Suid- Afrikaanse munisipaliteite aan Eskom uit die Wes-Kaap kom, is dit steeds iets wat ernstig aangespreek moet word, sê die Wes-Kaapse minister van plaaslike regering, omgewingsake en ontwikkelingsbeplanning, Anton Bredell.

Een van die munisipaliteite, Kannaland met skuld van R35 miljoen, is in die Klein Karoo geleë.

Die ander Wes-Kaapse munisipaliteite met groot skuld is Beaufort-Wes (R68 miljoen), Matzikama (R82 miljoen) en Cederberg (R37 miljoen).

By die vier munisipaliteite is die skuld ouer as negentig dae, het Bredell gesê.

“Die nie-betaling van Eskom is dwarsoor die land ’n simptoom van  swak of geen finansiële bestuur nie.

“Die Wes-Kaapse Departement van Plaaslike Regering werk tans aan verskeie inisiatiewe om dié probleem aan te spreek en om steun te bied waar nodig,” het hy bygevoeg. (Deur Liesel le Roux)