Hof sê nee vir Maggie

Magdaleen Titus tydens haar verhoor. Foto: Garnett Wicomb

’N AANSOEK van Magdaleen (Mag­- gie) Titus (43) om teen haar skuldigbevinding en vonnis te mag appelleer is gister (Woensdag 16 September) in die Kaapse Hooggeregshof geweier.

Magdaleen is op 3 Maart vanjaar in die rondgaande hooggeregshof op Oudts­hoorn tot le­wenslange ge­vangenisstraf gevonnis vir die moord op haar man, Pres­ton Titus.

Haar aansoek om verlof tot appèl is deur regter Robert Henney ge­weier.
Die verhoorregter, Nolwazi Ma­bin­dla-Boqwana, wat as gevolg van ander verpligtinge nie die aansoek om verlof tot appèl kon aanhoor nie, het tydens Titus se verhoor bevind dat sy die meesterbrein agter die beplanning van haar man se moord was en haar as ’n groot leuenaar beskryf. Sy het met vonnisoplegging gesê Ti­tus toon geen berou en aanvaar nie verant­woordelikheid vir haar optrede nie. Titus is ook drie jaar gevangenisstraf opgelê vir dwarsboming van die gereg.

Preston Titus is op 1 Desember 2017 in sy huis op Oudtshoorn met messe en ’n hamer vermoor. (Deur Liesel le Roux)