Wanneer mense saamwerk

Deur Liesel le Roux

Deur Liesel le Roux

Die redding van 12 jong sokkerspe­-lers en hul afrigter die afgelope week uit ’n grot diep onder die aarde in Thailand het baie mense se geloof in hul medemens herstel. Hoe waar is dit nie wat iemand die afgelope week iewers geskryf het nie:

Ongelooflike dinge gebeur as verskillende mense saamwerk met die oog gerig op ’n gesamentlike doelwit.

Die wyse waarop mense van oral af begin saamwerk het om die kin­ders te red en die reddingspersoneel te ondersteun – selfs van ander kontinente af –  kan ons weer laat glo dat mense ook kan bou en opbou en heelmaak.

Ons leef in ’n tydvak waarin ge­skille en sarkasme en kritiek die vals wysie ge­word het van baie se lewens. Verkleinerende woorde, gevoelose dade,  eiegeregtigheid en eiebelang is amper ’n lewenswyse.

Maar vir twee weke in 2018 het mense gegee waar hulle kon om ’n groep kinders uit die kloue van die dood te red. Skielik het dit nie saak­gemaak hoe enigiemand lyk of watter taal hul praat nie. Daar was diegene wat ure lank kos vir die kinders en red­dingswerkers gekook het; ingenieurs wat dag en nag water weggepomp het van die grot; spesialis­­- duikers wat al­les gelos en vrywillig na ’n vreem­de land gereis het om kin­ders se lewens te gaan red.

Daar was ook tragedie toe een van dié vrywilligers, Saman Kunan, aan ’n tekort aan suurstof gesterf het na­dat hy suurstofhouers vir die kinders en hul redders die grot ingeneem het.

Ek was die afgelope weke aangegryp deur hierdie menslike drama. Nie net omdat daardie kinders my kin­ders kon wees nie, maar oor die menslikheid, die omgee, die goedheid, die vasbera­denheid, doelge­rigt­heid en dapperheid van my mede­- mens.

Mag ons almal iets hieruit leer.
– Liesel le Roux

Be the first to comment on "Wanneer mense saamwerk"

Leave a comment

Your email address will not be published.


*