Deur Garnett Wicomb
DIE verhoor van twee senior weermagoffisiere wat tereg staan op klagtes van intimidasie en dat hulle die polisie in die uitvoering van hul pligte verhinder het, word vandag voortgesit.
Die verhoor, wat verlede week voortgesit sou word, is weens die siekte van die landdros vir nuwe verhoordatums tot vandag uitgestel.
Volgens die staatsaanklaer, adv Michelle Weyers, is die saak in oorleg met die twee beskuldigdes se regsverteenwoordiger, adv Mervyn Doralingo, uitgestel om sekerheid te kry wanneer die voorsittende beampte, streeklanddros Mark van Wyngaardt, wat steeds met siekteverlof is, weer met sy werk kan voortgaan.
Die twee offisiere – die bevelvoerder van die Infanterieskool op Oudtshoorn, kol Nkabu Nthejane, en ’n voormalige bevelvoerder, kol Xolanie Mankayi – pleit onskuldig op die klagtes teen hulle.