Miemie Maritz (regs agter) van die Wes-Kaapse Departement van Gesondheid, en Suné Rupping (naasregs agter) van die Oudtshoorn Rotariërklub kyk toe terwyl inwoners gesondheidstoetse ondergaan.
DIE Oudtshoorn Rotariërklub het op Woensdag en Donderdag, 2 en 3 Oktober, Rotary Family Health Days (RFHD) by Highgate Volstruisplaas en GG Kamp in Bridgton aangebied soos wat Rotariërklubs landswyd vir behoeftige gemeenskappe doen.
Die plaaslike gesondheidsdag op 2 Oktober is by die Highgate en op 3 Oktober by GG Kamp gehou.
Altesame 552 mense het gesondheidsdienste ontvang. Dié dienste sluit in die neem van bloeddruk, suikertoetse om diabete te identifiseer en HTS-toetse om mense met Vigs te identifiseer.
Van die inwoners het ook tandheelkundige dienste ontvang. Altesame 160 leesbrille is aan inwoners geskenk. Inwoners van die Dysselsdorp Outehuis het ook brille ontvang.