Oudtshoorn Rotariërs skenk komberse en mussies

Die Rotariërklub van Oudtshoorn het Woensdag, 15 Julie, uitgereik na die inwoners van Spieskamp en die Buffelsdrift-gemeenskap en daar 500 komberse, asook ’n groot aantal mussies, uitgedeel. Die komberse is ingesamel as deel van die klub se winterkombersprojek wat die voorafgaande Saterdag by die Klein Karoo-mark van stapel gestuur is.

Hulle doel was om 500 komberse aan behoeftige inwoners te skenk en hulle teen die Klein Karoo se koue winterweer te help beskerm.

Die veldtog het ’n besondere formaat gevolg: Vir elke R100 wat deur ’n lid van die publiek geskenk is, is een kombers aangekoop.
Die rotariërs het daarna die skenking geëwenaar deur ’n tweede kombers by te voeg.

Elke donasie van R100 het dus uiteindelik twee komberse vir die projek moontlik gemaak.

Lede van die klub het verlede Woensdag na Spieskamp en Buffelsdrift gereis, waar die 500 komberse aan inwoners oorhandig is.
Verskeie mussies is ook uitgedeel om verdere beskerming teen die koue te bied.

Die projek is deur die ondersteuning van inwoners, ondernemings en vriende van Rotariërs moontlik gemaak. Elke skenking, ongeag die grootte daarvan, het gehelp om die klub se doelwit te bereik en ’n tasbare verskil in die lewens van plaaslike families te maak.

Lede van die Oudtshoorn tak het hul dank uitgespreek teenoor almal wat tot die kombersveldtog bygedra en gehelp het om meer as net hoop na die twee gemeenskappe te bring.

Die sukses van die projek wys wat bereik kan word wanneer ’n gemeenskap en diensorganisasies saamwerk om na die behoeftes van kwesbare inwoners om te sien. Hierdie is een van verskeie projekte deur die Rotariërs. (ANGELIQUE ERASMUS)

• 
• 
• 
•