NAVORSING van die Cango Wildlife Ranch op Oudtshoorn toon dat sowat 20% van hul besoekers afkomstig is uit Indië, sê Tammy Moult, voorsitter van Oudtshoorn en De Rust Toerisme en assistent-direkteur van Cango Wildlife Ranch.
Moult het verlede Woensdag (26 Oktober) by ’n toerismenetwerkaand by die Wildlife Ranch verskeie interessante feite oor die demografie van besoekers aan Oudtshoorn gedeel.
Volgens haar het navorsing van die Wildlife Ranch voorts getoon dat dié besoekers slegs dagbesoekers is en nie op Oudtshoorn oorslaap nie omdat die dorp nie voorsiening maak vir hul dieetvoorkeure nie.
Op grond hiervan is ’n nuwe restaurant, Monsoon, met ’n halaal-kombuis pas op hul perseel geopen. Dit bied eg Indiese vegetariese disse.
Die restaurant se drie sjefs, Jagdeep Multani (restaurantbestuurder), Lokesh Jatt en Bherulal Meneria, is al drie vanaf Indië.
“Met die restaurant poog ons om Indiese toeriste langer in Oudtshoorn te hou, sodat hulle plaaslike akkommodasie kan gebruik en daar ook ongelooflik baie besienswaardighede in die omgewing is wat nie op een dag besoek kan word nie,” sê Moult.
Oudtshoorniete kan ook vanaf die spyskaart kos bestel en dit as wegneemetes huis toe neem by tel 044 272 5593.
Gaste is die aand met ’n ware smaakavontuur ’n voorsmaak gegee van die restaurant se kos.
Die netwerkaand is ook bygewoon deur die Groter Oudtshoorn se burgemeester, Chris Macpherson, en verskeie raadslede. (Deur Angelique Erasmus)
Navorsing wys 20% van toeriste uit Indië
Jagdeep Multani (restaurantbestuurder) en Tammy Moult (voorsitter van Oudtshoorn Tourismekantoor en assistant-direkteur van die Cango Wildlife Ranch). Foto: Christine Schoeman